Pituffimmi piumasaqaataalersut akisunaarneqarsinnaapput
Tassalu tamannarpiaq pillugu paatsuugalersitsinerit arlaqartut, danskit nunanut allanut tunngasunut ministeriannut, Martin Lidegaardimut maannakkorpiaq apeqqarissaarutigineqartut.
Pituffimmi suliariumannittussarsiuussisarnerit suliffeqarfinnillu kikkunnit tamanna akisussaaffigineqartassanersoq, nunanut allanut tunngasunut ministereqarfimmit ukioq kingulleq ilanngullugu akisussaaffigineqartarpoq. Tamannali amerikamiunut siorna tunniunneqarpoq, danskit tungaanniit aarleqqutigineqarmat, sullissisussarsiortarnerup kikkunnit akisussaaffigineqarnissaa eqqarsaatigalugu, tamanna EU-p inatsisaannik unioqqutitsinermik kinguneqassagatinneqarmat.
Tassalu tamannarpiaq pissutaalluni suliariumannittussarsiuussisarnermi piumasaqaatit nutaat atuutsinneqarlutik.
Piumasaqaatilli nutaanngortinneqarneri tunngavissaqanngitsut, nunanut allanut tunngasunut ministeri, Martin Lidegaard isornartorsiorneqarpoq aamma oqaatigineqarluni tamanna kukkunerup kinguneranik pisimasoq.
- Uani pineqanngillat danskit suliffissuaqarfiinut inatsisit pineqarlutilli, Danmarkip USA-llu akornanni isumaqatigiissutit pillugit piumasaqaatit, Martin Lidegaard isornartorsiuisunut akissuteqarnermini taama allappoq.
Folketingimi maanna oqallisigineqartunut pingaaruteqartunullu ilaavoq, Pituffimmi sullissisarneq Nunatsinni suliffeqarfimmit akisussaaffigineqarunnaarnerata kinguneranik, Nunatta karsianut aningaasat isertinneqartartut annaaneqarnerisa kingunerisinnaasaat.
Pituffimmi sullissisussatut toqqarneqartoq, Exelis Services amerikamiunillu suliffeqarfiutigineqartoq, aningaasanik katillugit 2,5 milliardinik iluanaaruteqartussaavoq.
Inuit Ataqatigiit sinnerlugit Folketingimi ilaasortap, Johan Lund Olsenip nunanut allanut tunngasunut ministeriannut, Martin Lidegaardimut eqqaamaqquaa, Kalaallit Nunaat EU-mut ilaasortaanngimmat EU-mi inatsisit apeqqummi massumani tunngavilersuutaasinnaanngimmata.
