Issittup qiterpiaa eqalukkat suaasa tukinngitsoortalernerisigut aarlerinartorsiortitaasoq
- Eqalukkat aarlerinartorsiortitaalerpata, Issittup qiterpiaa aarlerinartorsiulissaaq. Issittup ataqatigiinnera taamaalilluni aarlerinartorsiulerataannaavoq.
Pinngortitaleriffiup silap pissusianik ilisimatuarfianeersoq, Caroline Bouchard, taama oqarpoq.
Taassuma suleqaterpaalunilu Uummannap Sullata Qeqertarsuullu Tunuata imartaanni uumasuaraaqqanik ukiuni kingullerni pingasuni aasakkut katersisimapput. Pingaarnermik eqalugaaqqanik.
Eqalukkallu aarlerinartorsiortitaasut, ilisimatusarnerminni allaatigisaanni erserpoq. Allaatigisaat ilisimatusartut atuagassiaanni Arctic Sciencemi saqqummersinneqaqqammerpoq.
Eqalukkammi suaat eqalugaaqqallu Uummannap Sulluata Qeqertarsuullu Tunuata imartaasa kissatsikkiartorneranni aarlerinartorsiortitaalersimapput.
Eqalugaq
Eqalugaq nunatsinni sineriammiuuvoq sikuniluunniit saatsersormiuulluni.
Issittumi Canadap, Alaskap Siberiallu sineriaaanni siammarsimavoq.
Eqalugaq saarulliit ilagaat, taassumalu akuttusuunik marlunnik avaleraasaqarlunilu pingasunik sulussuguteqarnini ilisarnaatigaa.
Eqalugaq nunatsinni aalisarnermut pingaaruteqanngilaq, immamili uumasut allat nerisannaarimmassuk pingaaruteqarpoq.
Tusarfik: asimi.gl
Nerisareqatigiiaanut kingunerluutaasoq
Eqalukkat kisimik aarlerinartorsiortitaaleratik uumasorpassuit allat eqalugartortartut aamma aarlerinartorsiortitaalerput.
- Eqalugaarussappat qilalukkat qernertat aamma aarlerinartorsiulerataannaapput. Qernertanik qilalugaaruteqarataannaavoq. Natseeruteqaraannaavoq. Taava Issittoq Issittup kujasinnerusortaatut inneruleriataarsimassaaq, qaleraleeruteqaratarnissaanik aamma aarleqquteqartoq Caroline Bouchard oqarpoq:
- Kalaallit Nunaata imartaani qilalukkat eqalugartortuummata allanik nerisaqalernermikkut aniguiumaarnersut misissorusupparput. Eqalukkat qalerallillu imminnut attuumassuteqarnerat suli ilisimatusarfigineqarnikuunngilaq.
Sermersuarmit kuuit iluaqutaasinnaasut
Caroline Bouchardilli misissuinera aamma tusarluarnartortaqarataannaavoq.
Taannami eqalugaaqqanik, immami itivallaanngitsumiikkajunnerusaraluartunik, kangerluup Uummannap avannaani Ukkusissat eqqaanniittup imaata itinersaani nassaarsimavoq. Tamaani sermersuup kuuata erngani nillertumiipput.
Tassa imaappoq, silap pissusiata allanngoriartornera eqalukkat aarlerinartorsiortitaalinnginnissaannut aamma iluaqutaasinnaavoq.
- Paasisavut soqutiginaqaat. Eqalugaaqqanik Uummannap Sulluani taamaallaat nassaaratta, tamanna qanoq pingaaruteqartiginersoq suli naluara. Paasisaqarnerujumalluta ilisimatusarfiginerusariaqarpagut, Caroline Bouchard oqarpoq.
Taassuma eqalukkat pillugit ilisimatusarnerminit nutaamit allaatigisaa ilisimatusartut atuagassiaanni Arctic Science atuarsinnaavat.
