Nuummi partiit katerisimaarneri: Erinarsortut, qittattut siulittaasorlu misigissuseqangaartoq
Unnuk qinersivik pissanganartuaannarpoq, minnerunngitsumik partiinut ilaasortaasunut illersuisuinullu.
Demokraatit kinguariarnissaat qinersineq sioqqullugu isumasiuinerup takutikkaluaraa, partiip siulittaasua nuannaajummertoq naapipparput.
- Qinersisikka siulliit pingasut pissarsiaraakka, Demokraatit siulittaasuat, Jens Frederik Nielsen nuannaaqaluni nillerpoq.
Parteeqatini arlallit assigalugit, Jens Frederik Nielsen siullermeerluni qineqqusaarpoq, misigissutsillu ikinngitsut aqqusaartaqattaarpai.
- Nuannaarpunga, pissangavunga, isumalluarpunga, nalornilaarpunga. Misigissutisit tamaasa atorpakka, Jens Frederik Nielsen oqarpoq.
Qineqqusaartut isumasiunermi inernerit naapertorlugit ima ilaasortaatitaqartigilissapput:
- Atassut: Marluk.
2018-imi apriili kingullermik qinersinermi aamma marlunnik ilaasortaatitaqalerpoq. - Demokraatit: Sisamat.
Qinersinermi kingullermi arfinilinnik ilaasortaatitaqalerput. - Inuit Ataqatigiit: Aqqaneq-marluk.
Qinersinermi kingullermi arfineq-pingasunik ilaasortaatitaqarlerput. - Naleraq: Tallimat.
Qinersinermi kingullermi sisamanik ilaasortaatitaqalerpoq. - Siumut: Arfineq-pingasut.
Qinersinermi kingullermi qulingiluanik ilaasortaatitaqarlerpoq. - Nunatta Qitornai: Soqanngilaq. Inatsisartuni ilaasortaatitaqarunnaarpoq.
Qinersinermi kingullermi ataatsimik ilaasortaatitaqalerpoq - Suleqatigiissitsisut: Soqanngilaq, Inatsisartunilu ilaasortaatitaqarunnaarlutik.
Qinersinermi kingullermi ataatsimik ilaasortaatitaqalerput.
Tusarfik: Sermitsiaq.ag.
Kulturip illorsuani Katuami Siumukkut katerisimaarput, unnuullu aallartilaarnerani katerisimaarnerat eqqissisimaqaaq. Siumut siulittaasuat, Erik Jensen isersimanngilaq nipilersuutillu uninngaannarlutik. Katerisimaarneq eqqissisimagaluaqisoq partiimut allattaagallartup, Jenseeraq Poulsenip inuit qiimmannerunissaat qularinngilaa.
- Inuit maani nuannisassapput, soorunami. Nuannisariartornissaat aamma siunertaavoq. Inuit takkuttussat nuannisassaqaat, taanna qularinngilara, Jenseeraq Poulsen oqarpoq.
Qineqqusaarsimasullumi qineqqusaarneq nuannallutik naggasissagaat qularnanngilaq. Inatsisartunut kommunalbestyrelsenullu qinersinerit inerneri isiginnaarutikkulli malinnaanissaq soorunami salliuvoq.
Inuit Ataqatigiit partiini anginersaanngussasoq isumasiuinermi kingullermi erserpoq. Taamaattumik Narsami partiip taaguunneqarnerata siuariarujussuarsimianera tupaallaatigaat, Narsamimi taasisimasut 70,9 procentiisa Inuit Ataqatigiit qinersimavaat.
Narsaq qineqqusaarnerni qulequttani eqqartorneqartut pingaarnerit ilagaat, Kuannersuarni aatsitassanik qaqutigoortunik piiaasoqalissanersoq oqallisigineqarami.
