Uummannami nukissiorfimmi ikuallanneq

Uummannami nukissiorfiup ippassaq ikuallannerata kingorna, marlunngornermi ullaakkut killiffik ippassaq unnukkulli allanngunngilaq.

Imaappoq, Ilulissanit umiarsuarmik illoqarfimmut unnuup ilaani tikiuttoqarnissaa naatsorsuutigineqartoq, Nukissiorfiit nittartakkaminni allapput.

- Aammattaaq ajornartoornermi ikiuukkiartortitat suliaqaqataajartortussat aallartinneqareerput.

Ilulissani ajornartoornermi generatorinut attaviliiniarnerup nalaani innaallagissamik pilersuinerup uneqattaartarsinnaanissaa naatsorsuutigineqassasoq, ingerlatseqatigiiffik allappoq.

- Tamanna suliap isumannaatsumik pilertortumillu naammassiniarnerani pisariaqarsinnaasoq, nalunaarummi allaqqavoq.

Nukissiorfiup innuttaasunut angerlarsimaffimminni suli innaallagiaaruteqqasunut allapput, unnugu unnuap qeqqata missaani innaallagianeqqinnissartik naatsorsuutigisinnaagaat.

Tusassimmit nalunaarut kingulleq

Illoqarfimmi napparutip ataatsip ajornartoornermi generatorimit innaallagialersugaammat, Uummannami innuttaasut attaveeruttoqarnissaa ernummatigissanngikkaat, Tusassip KNR-imut nalunaarutigaa.

Umiarsuaq tikiuttussaq ajornartoornermi generatorinik useqarpoq taakkualu aappaat Tusassimit atorneqassasoq, Tusassimit nalunaarutigineqarpoq.

Kalaallit Nunaanni Politiinit nutaarsiassat kingulliit

Kalaallit Nunaanni Politiit nalunaarutaat kingulleq naapertorlugu, Nukissiorfiit ikuallattoq qamilluarniarlugu suli sulipput.
Illoqarfiup ilaani innaallagiaaruttoqarnera pissutigalugu katersortarfik ammavoq, innuttaasullu tassani innaallagiamik atuisinnaallutillu kissasersinnaapput. Politeeqarfik ulloq unnuarlu sulisoqarpoq, politiit Facebookimi allapput.