Uummannami imeq uuliamik akoqalaaraluartoq imerneqarsinnaasoq
Uummannami imeq decemberip ulluisa aqqarnganni misissuiffigineqarpoq, erngullu aqqutaani sumiiffit ilaanni imeq uuliamik annikitsuararsuarmik akoqartoq misissuinermi inernerit Ilisimatusarnermut Avatangiisinullu Naalakkersuisoqarfimmit decembarip ulluisa 21-anni pissarsiarineqartut takutippaat.
Imerli imeqarfimmeersoq imerneqarsinnaasoq, Naalakkersuisoqarfiup tusagassiuutinut marlunngornermi unnukkut nalunaarutaani erseqqissaatigineqarpoq.
Uummannami imeq peqqissutsimut ajoqutaananilu suli imerneqarsinnaasoq, Ilisimatusarnermut Avatangiisinullu Naalakkersuisoqarfik nunatta nakorsaanera isumasioqatigereerlugu naliliivoq.
AAMMA ATUARUK Nukissiorfiit: Erngup mamaannera kianneranik pissuteqarpoq
Uummannami imermik pilersuineq decemberip ulluisa aqqarnganni akornuteqalerpoq, erngullu aqqutaa imermik kingorna immerneqaqqimmat ruujorit qalippernerinit uuliamineq kaanngarluni imermik pilersuinermut siaruaappoq.
Uulia pineqartoq 2019-imi septembarimi kukkusoqarnerani uuliap illoqarfiup ernganut akuliunneqartup assigigaa, Ilisimatusarnermut Avatangiisinullu Naalakkersuisoqarfik tusagassiuutinut nalunaarpoq.
Erngup aqqutaa biilillu imertaassuit imiisiviillu Nukissiorfinniit kingorna salinneqaqqissaarput.
Allanik iliuuseqartoqartariaqarnera naatsorsuutigineqanngilaq. Naalakkersuisoqarfiulli pisut malinnaaffigigai imerlu misissorneqallattaassasoq, Namminersorlutik Oqartussat nalunaarput.
