Nuugaatsiaq Uummannami eqqaaniaasoqarpoq
Naallu pisoq annernaraluaqisoq, Maj-Brit Therkelsenip eqqaaniaanermi peqataasinnaanini nuannaarutigaa:
- Uannut eqqissiallannartorujussuuvoq. Pisoq soorunalimi annerneraraluarpoq, kisianni
najuuffigalugu assut eqqissiallaatigivara, Maj-Brit Therkelsen, Uummannameersoq, taama oqarpoq.
Taassuma qatanngutini, ilaqutaasalu Nuugaatsiami juunip ulluisa 17-ianni tassaarsuaqarnerani annaavai. Maj-Brit Therkelsen Danmarkimi maanna ilinniartuuvoq, tassaarsuaqarsimaneralu Danmarkimiinnermini tusarlugu.
Uummanniarnissani ilimagisimanngikkaluarpaa
Saffiuutut Viborgimi ilinniartuuvoq, soraarummiileruttorfiullu nalaani tassaarsuaqarluni. Eqqaaniaasoqarnissannut taamaammat peqataasinnaanissani ilimagisimanngikkaluarpaa, tamannalu akueriinnarsimagaluarlugu, namminerlu oqarneratut Nunatsinnukarnissaminut akissaqannginnami.
Ilinniarnerminulli atatillugu suliffimmik misiliinissamut siunnersortaa taava sianerpoq oqarfigalugulu Uummanniarsinnaassasoq:
- Ilimaginngiivikkakku taama oqarfigineqassallunga, maanngartussanngorluta. Taava assorujuk tupappunga, oqarneq ajulerlunga. Allaat apereqqippara, nassuiaateqqippaangalu. Assut nuannerpoq, Maj-Brit Therkelsen taama oqarpoq.
Lions Clubip 15.000 koruuninik aningaasaliineratigut taassuma panialu pingasunik ukiulik Uummannamukarsinnaanngorput. Uummannalli nalaani tassaarsuaqarnera Danmarkimiit tusarlugu Maj-Brit Therkelsenip pikkunanaarpaa:
- Assut pikkunarpoq, ataatagalu ilaquttakkalu Uummannamiillutik, taamannallu pisoqartoq, ernumaneq assut misigivara. 17-iani isoqartoq 18-iani ullaakkut aatsaat tusagaqarama. Assorujuk pikkunarluni. Ornigukkusukkaluarluni, kisianni aappaatigut aamma ornigussinnaanani, taamannak ulorianartoqarnera pissutigalugu. Assut pikkunarpoq, Maj-Brit Therkelsen, Uummannameersoq, KNR-imut taama oqarpoq.
