Uumasut nunarsuup isuinut nuukkiartorput
Nunami uumasut ukiut qulikkaarlugit 6 kilometerinik nikittarlutik sikuiuitsunut qaninneruleriartortut, imaani uumasut kianneruleriartorneranik malussajanerpaat quleriaat sinnerlugu sukkanerullutik nikittarput. Tassa ukiumut 72 kilometerinik nikittaramik.
Taamalu pisoqarpoq, naak immap qaavata kianneruleriartornerata nunap qaavata kianneruleriartornerata sukkassusia pingajorarterutigiinnaraluaraa.
Imaani uumasut nikerarnerannik nunanit tamalaani nalunaarsukkani, USA-miittumi University of Santa Barbara-mi suleqatigiissitat katersorsimasaanni, taama inerniliussaqarpoq.
Misissuineq atuagassiami Nature Climate Change-mi saqqummiunneqaqqamerpoq, taannalu imaani uumasut nikerarnerannik nalunaarsuinerit siullersaraat.
Uumasunik isiginnaartarnerit 1.735-t agguaqatigiisillugit ukiunik 40-nik sivisussusilikkaat misissuinerni tunngaviupput:
- Ataatsimut isigalugu imarpissuarni uumassusillit amerlasoorsuit uumaannarumallutik uumaffinnaaminnit allanut nuunerannik silap allanngorniartornera kinguneqarpoq, Naalagaaffinni Peqatigiinni silap allanngoriartorneranut ilisimatuut ilaat, professor Camille Parmesan, oqarpoq.
Ingammik uumasuaqqat immap ikerinnaaniittut aalisakkallu nuutttartut misissuinerup takutippaa.
- Nunami allanngoriartornerit aamma immani takussaasut inerniuliussani erserpoq. Immami allanngoriartornerit ingasannerullutik, professor Camille Parmesan nangippoq.
- Misissuinermit matumannga silap allangoriartornerata nunarsuatsinnut sunniutasa ataatsimut nalilerniarneranni, imarsuit ilanngunneqartaarnissaannut patajaatsumik tunngavissaqalerpugut, Camilla Parmesan erseqqissaavoq.
Silap pissusiata allangoriartorneranik ilisimatuut Naalagaafiit Peqatigiit ataaniittut nalunaarutaanni naliliissutaasut tallimassaat 2014-imi naammassineqasangatineqarpoq.
