Uumasuaqqat immap ikerinnarmiut Canadami nunaqarfiup eqqaani tippaattut

Uumasuaqqat issittup imartaata ikerinnaaniittut, planktonit, millionilippassuit Canadami Nordvestterritoriami Paulatukip Beafortip imartaanut sineriaanut tipisimapput.
Uumasuaraq immap ikerinnarmiu pineqartoq. Assi © : World register of marine species
Paulatuk, N.W.T. Assi © : Googlemaps
Allattoq Marianne Stenbæk, Montreal, Canada
aggustip 02-at 2016 07:54
Nutserisoq Simon Uldum -

Uumasuaqqat immap ikerinnaaniittut immikkuullarissuupput Beafortillu imartaani issittullu imartaani allani uumasuullutik. Uumasuaraq immap ikerinnaaniittoq mikisunnguuvoq, centimeterinik tallimanik takissuseqalersinnaalluni kinguppaaqqamullu assingusinnaalluni. Uumasuaraq eqaluit, saarulliit puisit timmissallu nerisaraat.

Nunaqarfiup Paulatukip 300-t missaannik innuttaqartup sissaani kilometerinik qulinik isorartutigisumi uumasuaqqat taama ittut tipisimapput.

Themisto Libellula.

 

Maannalu Paulatuk tamakkerlugu tipersuaq atuuppoq, aalisakkanut tippassimasunut assingusumik tipeqarluni. Uumasuaqqammi immap ikerinnaaniittut sissamut tipisimasut tippaatilersimapput.

Louis Fortier issittumi uumassusilinnik ilisimatuujuvoq ilisarisimaneqarluartoq, taassumalu nutaarsiassaqartitsivimmut CBC Newsimut oqaatigaa anorip sammiviata allanngoriataarnera pissutigalugu uumasuaqqat immap ikerinnaaniittut Paulatukip eqqaanut katersuuteriasaarsimasinnaasut.

Tamatumunngalu assingusumik issittumi ataasiaannarluni siornatigut pisoqarsimavoq - tassalu Svalbardip eqqaani 2001-imi.

Louis Fortierip aamma oqaatigaa uumasuararpassuit timmissanit nerineqarnissaat neriuutigineqartoq, uumasuaqqat tippassimasut allatut peerneqarsinnaanerat ilimanaateqanngimmat

 

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq