Uumassuseqarnerup pinngorneranik apeqqut Isuani akissutissarsiniarpaat

Qanoq ililluta pinngorpugut? Uumassuseqarnerup qanoq pinngorsimanera ilisimatuut akissutissarsiniarlugu paasiniartuarpaat. Nuup eqqaani Isuani Kalaallit Nunaanni ujaqqat pisoqaanersaannik, ujarassiornermik ilisimatuup, Minik Rosingip ilisimatuunik allanik nunanit tamalaaneersunik peqateqarluni misissuinerisa nutaat tamatuma paasineqarnissaa qanillisippaat.
Forskerne fra Australien har angiveligt fundet fossilerne i et klippestykke fra Isukasia nordøst for Nuuk.
Allattoq Gedion Storch
oktobarip 20-at 2011 15:33

- Qaqqat ilusaasa pissusaasalu ilaasa avatangiisigisimasaannik nassaarpugut, uumassuseqarnerup qanoq ililluni aallartissimaneranik paasissutissiisinnaasunik. Isumaqanngilagut ujaqqat tassaassasut uumassusermik pinngorfiusut, tassami ilisimareeratsigu uumassuseqarneq Isuata pinngornera sioqqullugu pioreersimasoq. Kisianni tamatuma qanoq ililluni pinngoriartorsimanera pillugu Isua atorsinnaavarput. Nunarsuarmi uumassusilimmik siullerpaamik nassaarnissarput neriuutigissanngilarput, taamaattorli uumassuseqarnerup pinngornerata nalaani pissutsit qanoq ittuusimanersut paasisinnaalerpavut, Minik Rosing oqarpoq.

Isuata eqqaani ujaqqat Kalaallit Nunaanni pisoqaanersaapput, ukiunik 3,8 milliardinik pisoqaassuseqarlutik. Ilisimatuut oqarnerat naapertorlugu qangarsuaq Isua itinersuarmiissimagaluarpoq, soorlu Manerassuarmi Marianer Graven taamaattoq, tamatumalumi ujaqqat uumassuseqalernissamut pinngoqqaatinik akoqarnerata ersersippaa.

 - Kikkut tamangajammik isumaqatigiissutigivaat uumassuseqarneq imaanit pinngorsimasoq, tamatumalu kingorna siaruaakkiartorluni, immaqaluunniit immap naqqani aallarteriarluni tamanut siaruaassimasoq, Minik Rosing oqarpoq.

Ilisimaneqanngilaq uumassusilik siulleq qanoq ittuunersoq. Taamaattumik misissuinerit tamatuma qanoq pisinnaasimanerata paasinissaanut ilisimatuut ikiussavaat.

 - Uumassusilik siullerpaaq pillugu ilisimasaqartoqanngilaq, kisianni avatangiisit makku oqaluttuarisinnaavaat uumassuseqarnissamut piumasaqaatit qanoq ittuusimanerat. Tamatumalu paasineqarnissaanut pitsaanerusumik periarfissaqalerpugut.

Tamannalumi inuppassuit eqqarsaatigisarsimassagaat, Minik Rosing isumaqarpoq.

- Nalinginnaasuuvoq uagut sumit pinngorsimanitta paaserusunneqartarnera. Isumaqarpunga tamatta tamanna eqqarsaatigisaripput, illuatungaanilu aamma isumaliutigineqartarpoq, aamma allami uumassuseqartoqalersinnaanerluni. Uumassuseqartoqarsinnaaneranut pissutsit immikkorluinnaq ittut atuuttariaqarnerlutik, taamaattoqassanngippallu taava eqqarsaatigineqarsinnaavoq avataarsuani allami uumassuseqartoqarsimassasoq.

Ilisimatuussutsikkut misissuinerit inernerat amerikamiut atuagassiaanni Proceeding of the National Academy and Sciences, PNAS-imi, saqqummersinneqarpoq. 

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq