NUNAOIL A/S: Uuliasiorusuttoqanngimmat pisortaq soraartussanngorpoq

Kalaallit Nunaanni uuliasiornissaq soqutigineerukkiartorpoq. Ingerlatseqatigiiffiit arfineq marluk misissuinissamut atatillugu akuersissutitik kingulliit tunniuppaat, nutaanillu akuersissutinik soqutiginninneq aatsaat taama annikitsigivoq, tamannalu siumut saatinnissaa ilimanaataarulluni, NUNA OIL A/S taama nalunaaruteqarpoq.

Taamaattumik ingerlatseqatigiiffiup ingerlatseqatigiiffittut annikillisaavoq. Tamanna kinguneqarpoq, ukiuni aqqaneq marlunni pisortaasimasoq, Hans Kristian Olsen juulip aallaqqaataanit 2018-imi soraarsinneqartussanngormat.

Taamatuttaaq siulersuisuniittut tallimaasarunnaarlutik pingasunut ikilisinneqassasut, immikkut ataatsimeersuarnermi tamanna sisamanngornermi aalajangerneqarpoq.

- NUNA OIL-ip piginnittai isumaqatigalugit tamanna aalajangiunneqarpoq, aamma ingerlatseqatigiiffiup aningaasartuutai ikilisinniarneqarput, suliffeqarfik tusagassiorfinnut taama nalunaaruteqarpoq.

NUNA OIL A/S-ip illuutini marluk tunereerpai. Suliffeqarfillu siunissami nutaamik pisortaqalerpat aqutsisunngussaaq, siulersuisullu naatsorsuutigaat, ujarassiuumik PhD-imik ilinniagaqarsimasumik sulisussamik atorfinitsitsissallutik.

NUNA OIL 2016-imi tallimanik sulisoqarpoq. Naatsorsuutillu 5.7 milliuunit koruuninik amigaartooruteqarlutik.

Siulersuisut issiasussat tassaalissapput: Stine Bosse, Søren Lennert Mortensen aamma Peter Helmer Steen.