Uuliasiortut umiarsualiviat Aasiaanniittussaq pilersaarusiorlualereerpaat
Arctic Base Supply umiarsualiviliorniarnermi nunaminertamik 200.000 kvadratmeterisut angitigisumik qinnuteqareerpoq.
Suliffeqarfik Arctic Supply uuliasiornermut atatillugu Aasianni umiarsualiviliornissamik pilersaaruteqarpoq. Suliffeqarfik Arctic Base Supply Danmarkimi umiarsuaatileqatigiiffimmit Maersk-imit Royal Arctic Line-millu pigineqarpoq.
Arctic Base Supply ukiup nikinnerani Aasianni umiarsuliviliornissaq siunertaralugu, nunaminertamik qinnuteqarpoq, itigartinneqarlunili, Aasianni mittarfiup tallineqarsinnaaneranut akornusiisinnaamat.
Arctic Base Supply Aasianni umiarsualiviliornissamut nunaminertamik 200.000 kvadratmeterisut angitigisumik kissaateqarpoq.
Nuummi umiarsualivik nunatsinni umiarsualivinni anginersaasoq, 33.000 kvadratmeterisut angitigivoq.
Arctic Base Supply-ip pisortaanera Steen O. Hansen nalunaarpoq, umiarsualiviliornissami sanaartukkat tulleriaarnissaat pilersaarutaasoq, soorlu umiarsuliviliornermi atortussat katersorneqareerpata, umiarsualiviup sanaartornissaa pilersaarutigineqarlui.
Umiarsualiviliornissamik isumassarsiaq siorna aallartippoq, uuliasiortitsiviup Cairn Energyp suleqatigineqarnerani. Taamani Cairn Energyp paasivaa, Kalaallit Nunaata sananeqataani pilersaarusiorsinnaaneq killeqartoq, uuliasiornissarlu annertusineqassappat, atugassarititaasut ajunnginnerusariaqartut, Steen O. Hansen oqarpoq.
Aasianni umiarsualivimmik sanaartorneqarsinnaasumik allami inissisimasinnaasumi Qaasuitsup kommunia nunaminertamik misissuivoq, misissuineq ukiup ingerlanerani naammassineqarnissa naatsorsuutigineqarluni.
Suliffeqarfip Arctic Base Supplyip umiarsualiviliornissamik pilersaarusiaa Kalaallit Nunaanni uuliasiortitsiviit suleqatigiiffiata Greenland Oil Industry Association-ip qanoq isumaqarfigineraa pillugu paasissutissiisoqarnissaa utaqqineqarpoq.
Suliffeqarfik Arctic Base Suplly siorna pilersinneqarpoq, Kalaallit Nunaanni uuliasiornissamik akuerisaasunik kiffartuussinermik suliaqartuulluni.
Kiffartuussinerit tassaallutik; assartuinerit, sulisunik atortunillu angallassinerit, allaffissornerit, quersuarnik attartortitsinerit, sulisussarsiornerit, nerisassanik isumaginninerit, atortunik iluarsaassinerit aserfallatsaaliinerillu.
