Uuliasiortoqalerpat sillimaniarnermut piumasaqaatit sakkortuut atorneqassapput
Uulisiorneq aallartippat umiarsuit aqqanillit qilleriviup eqqaani sillimatinneqassapput, kiisalu ajutoortoqassagaluarpat tuluit nunaannit akunnerit 72-it ingerlanneranni ajutoorfimmukarsinnaasut piarersimatinneqassapput, Inuussutissarsiornermut Aatsitassarsiornermullu Naalakkersuisoq Ove Karl Berthelsen oqarpoq.
Ajutoortoqassagaluarpat sillimaniarnermut piumasaqaatit sakkortunerpaat, uulisiorniarlutik qinnuteqartunut ilisimatitsissutigineqarnikuupput erseqqissaatigineqarlutillu, Ove Karl Berthelsen oqarpoq.
Norskit Nordsømi uuliasiorlutik sillimaniarnermut piumasaqaataasa assinganik nunatsinni uulisiorniartut piumaffigineqassapput.
Uuliasiortussat sillimaniarneq atortussallu akissusaaffigissavaat, piumasaqaatillu sakkortuut aallaavigalugit ingerlanneqartussaasut, Ove Karl Berthelsen oqarpoq. Umiarsuit aqqanillit sillimaniarmut atortullit uulisiorfissat marluusut eqqaaniissapput, uuliamik aniasoortoqassagaluarpat saliinissamut piareersimasussaat. Taakkua saniatigut Aasianni umiarsualivimmi sillimaniarnermut atortussanik annertuunik inissiisoqaasaaq, ajutoortoqassagaluarpat qillerivimmut ingerlannaq aallarunneqarsinnaasunik, Ove Karl Berthelsen oqarpoq.
Tuluit nunaanni piareersimatitsisoqassaaq uulisiornermi ajutoortoqassagaluarpat akunnerit 72-it timer ingerlaneranni ajutoorfiusumut anngussinnaasunik, tassaniippullu nunarsuarmi sumiiluunniit uuliasiorluni ajutoortoqartillugu sillimaniarnermik atortut atorneqarsinnaallutik, Ove Karl Berthelsen oqarpoq. Uuliamik qillerinerit aasaru aallartinneqassanersut Naalakkersuisut suli aalajangiiffiginngilaat. Tamanna qaammatip uumap ingerlanerani imaluunniit junip qaammataata ingerlanerani aalajangiiffigineqassaaq.
