Uuliasiortitseqatigiiffiit akiliisinneqassanngillat

- The Guardian paatsuugaqarsimavoq. Taakkummi oqaatigaat aningaasat qularnaveeqqutitut akiliutigineqartussatut piumasarisavut 2 milliardit dollariusut. Taammaattoqanngilaq, 10 milliardit dollariunissaammi piumasaraarput, Aatsitassanut ikummatissanullu pisortaqarfimmi pisortaq Jørn Skov Nielsen oqarpoq.

Cairn Energy Qeqertarsuup eqqaani uuliasiornialermat qularnaveeqqutitut atugassanik akiliivoq, uuliasiortitseqatigiiffiillu allat aamma taamaaliortussaapput.

- Kalaallit Nunaanni qillerisoqarniarpat pinngitsoorani qularnaveeqqusiisoqartussaavoq, aningaasat saliinissamut atorneqartussatut naatsorsuussat akiliutigineqartartussaallutik, soorlu uuliamik maqisoortoqarpat, allatigulluunniit ajutoortoqassagaluarpat, Jørn Skov Nielsen oqarpoq.

Uuliasiortitseqatigiiffiillu qularnaveeqqusiiniarunik ikinnerpaamik 10 milliardit dollarinik qularnaveeqqusiisarnissaat Nunatsinni oqartussat piumasarigaat, Jørn Skov Nielsen erseqqissaavoq.

Baffinilli kangerliumarngani uuliasiornissamut akuersissutit qassiunersut taassuma saqqummiukkumanngikkallarpai, sulimi isumaqatigiinniartoqarmat. Pingaaruteqartorli tassaavoq:

- Pinngitsoorani qularnaveeqqusiisoqartartussaavoq, tamanna allaqqunneqarsinnaanngilaq.

Uuliasiortitseqatigiiffiit Shell, Statoil, Dong Energy, Mærsk aamma Cairn uuliasiorsinnaanissamut qinnuteqaateqarsimasut ilimagineqarpoq, Jørn Skov Nielsenilli tamanna uppernarsarusunngikkallarpaa.

Isumaqatigiinniarnerillu inaarsarneqaleruttortut oqaatigalugu.