Uuliasiornerup tungaatigut aallarteqqittoqalerpoq
Misissuinissamut akuersissutinik qinnuteqartut ilagaat uuliasiorfissuit Shell, Chevron, Statoil, BP aamma Japan National Oil Corp., aammattaaq NunaOil Nunatsinneersoq misissuinerup ingerlanerani 12,5 %-inik piginneqataanermigut naammaqqutitut suleqataalluni akuersissutini tunniunneqartuni peqataassaaq.
A. P. Møller-Mærskip uuliasioqatigiiffia, Maersk Oil, Kitaani akuersissummik pigisaqareersoq, qinnuteqartut akornanniissagunanngitsoq, Berlingske Business ullumi taama allaaserisaqapoq.
Aviisip paasisai malillugit uuliasioqatigiinneersut ulluni makkunani Nuummukassapput akuersissutit pillugit isumaqatigiissutit Aatsitassanut Inuussutissarsiornermullu naalakkersuisumut Jens-Erik Kirkegaardimut atsioqatigiissutiginissaannut piareersariartorlutik.
Aviisi naapertorlugu Namminersorlutik Oqartussanut isumaqatiginninniarnerit arlaleriarlugit kinguartinneqartarsimanerat uuliasioqatigiinnit kipiluttunartissimavaat.
Aamma uuliasioqatigiinnik isumaqatiginninniarnerit tamaasa naammassineqarsimanersut suli ilimaneqanngilaq.
Nunatta avannaata kangiani imartaq nunarsuatsinni sinerissap avataani uuliasiorfiit avannarpasinnersarilersinnaavaat. Tassanilu uuliasiorluni misissunissamut akuersissutinik siullerpaamik tunniussisoqassaaq.