Uuliasiornermi gassisiornermilu najoqqutassat nutaat
Amerikami ilisimatusarfiup isummersuisitullu atuuttup tusaamasap, Pew Charitable Trustsip, issittup imartaani uuliamik gassimillu qalluinermut najoqqutassatut kissaatigineqartut pillugit nalunaarusiani saqqummiuteqqammerpaa.
Nalunaarusiami isummiunneqartoq tassaavoq amerikami naalakkersuisut issittup imartaani qillerinissat illersorneqarsinnaasumik ingerlanneqarnissaat qulakkeerniarlugu najoqqutassanik oqaasertalersuillutillu aqutsisariaqartut.
Nutaarsiassaqartitsivik UPI naaqpertorlugu, Pew nalunaarusiamini allappoq issittumi sakkortuumi sunnertiasumilu uuliakoortoqarnissaa pinaveersaartinniarlugu sillimaniarnermut najoqqutassanik naleqquttunik aalajangersaasoqarnissaa pisariaqarluinnartoq.
Pewip nalunaarusiaa, septembarip 27-iani saqqummersinneqartoq, kaammattuutinik 80-inik imaqarpoq. Pewip ilaatigut siunnersuutigaa issittup imartaani uuliasiorluni gassisiorlunilu qillernerit ukiumut taamaallaat ulluni 100-ni ingerlanneqartassasut, sikup aanneratigut qilleriviit atortorissaarutillu allat, soorlu annaassiniarnermi atortut imaannarmi atorneqarsinnaassammata.
Nalunaarusiami aamma oqaatigineqarpoq uuliasioqatigiiffit gassisioqatigiiffiillu issittumi suliaqartut tamarmik assigiinnik najoqqutassaqartinneqassasut.
Amerikami nunami namminermut ministeriaqarfik aamma issitummi sinerissap avataani qillerinermut najoqqutassat pillugit ukioq naanngitsoq nalunaarusiamik saqqummersitsisussaavoq.
