Uuliasiorneq pillugu paasissutissat ikippallaartut
- Apeqqutit tunngaviliisorujussuit akissutissaqartinngikkutsigit, isummernissaq ajornarpoq, Naaja Nathanielsen oqarpoq.
Taamaammallu Naalakkersuisunut assigiinngitsorpassuarnik apeqquteqarpoq.
Eqqarsaatigaara apeqqutikka pitsaanerusumik aamma kikkunnilluunniit illersuinngitsumik oqallinnissamut tunngavissiissasut, Naaja Nathanielsen oqarpoq.
Massakkutummi ingerlasoqartillugu paasissutissat, uuliasiorneq pillugu oqallinnermi tunngaviusut, naammanngillat.
- DMU-p allaaserisai assersuutigalugit atuaraanni, apeqqutigiumasat ilaannut akissutissarsinarpoq. Apeqqutilli ilaat suli akineqanngillat, Naaja Nathanielsen oqarpoq.
Suummiukua Naalakkersuisunit akineqarnissaat ujartorai?
- Assersuutigalugu akuutissanut qillerinermilu miligutissatut atukkat pillugit Namminersorlutik Oqartussat qanoq politikeqarniarpat? Aamma inuiaqatigiiulluta sunik piumasaqarniarpugut. Tamakkua akineqarnissaat qilanaaraakka, Naaja Nathanielsen oqarpoq.
Tassami oqarneratut:
- Uangami ilisimaareqqinnaarpara, aningaasarsiornerput aalisarnermit suli tunngaveqartorujussuussoq. Taamaammallu immap qanoq sunnerneqarsinnaanera eqqarsaatigisorujussuuara. Aammalumi qillerinermi qilleriffiup qanittuata sunnerneqarnissaa pinngitsoortinneqarsinnaanngilaq, tamatumalu sapinngisamik isumannaatsuunissaa eqqarsaatigeqaara, Naaja Nathanielsen oqarpoq.
Taassuma apeqquterpassuarnik Naalakkersuisunut nassiussinera Siumup siulittaasuata, Aleqa Hammondip, nuannaarutigeqaa, Namminersorlutik Oqartussanit paasissutissiisarnerup pitsaassusianik Naalakkersuisut tunuliaqutaasa illua tungiliuttutulli aamma naammaginnikkunnaarsimanerannut taamaaliorneq ersiutaanerarlugu. Naammaginninnginneq inuiaqatigiinnut siaruaatissasoq, Aleqa Hammond oqarpoq.
- Pasissutissat maannakkut ima annikitsigaat, inuiaqatigiinnut paatsuungatitsinermik annilaangatitsinermik allaat kinguneqarlutik. Naalakkersuisut inuiaqatigiinni annilaanganeq annikillisarniarunikku paasissutissiisarnertik annertusisariaqarpaat, Aleqa Hammond oqarpoq.
Tassami Naalakkersuisut Aatsitassanullu Pisortaqarfiup paasissutissiineq annertusanngippassuk, uuliasiornermut innuttaasut tapersersuinerat millisinnaasoq, Siumup siulittaasuata aarleqqutigaa:
- Inuiaqatigiit paatsuungatinneqartut peqataatinneqanngitsullu akuutinneqarsinnaanngillat. Taamaattumik inuussutissarsiummut nutaamut tassunga, aatsitassarsiornermut tunngasumut, neriulluarfigineqartumut inuiaqatigiit peqataatinneqassappata, innuttaasut qanimut suleqataatinneqarnissaat avaqqunneqarsinnaanngilaq. Taamaanngippat neriulluarneq annilaanganermik taarserneqassaaq, Siumup siulittaasua, Aleqa Hammond, oqarpoq.
