Mærskip uuliasiorfiini sulisut arlaqartut isumannaallisaanermut ajornartorsiuteqarnerit pillugit naammagittaalliorput.
Taamatut unnerluusillutik saqqumiussisuupput Tuluit Nunaanni sulisartut kattuffiat, Rail Maritime and Transport, Mærskip uuliasiorfiini sulisut sinnerlugit kattuffik, aviisi Information taamatut allaaserisaqarpoq.
- Mærskip uuliasiorfiinni isumannaallisaanermut tunngassuteqartunik isornartorsiuteqartut akornusersorneqartarsimapput, aammalu sulinerminni ulorianartunik atukkatik nammineerlutik aaqqiissuteqartut akornusersorneqartarsimallutik, taama oqarpoq, Jake Molloy uuliasiorlutik sulisut 4500-uusut sinnerlugit sulisartut kattuffiata sinniisua.
Uuliasiorfimmi sulisut amerlaasuut isumannaallisaanermi amigaatigineqartut nalunaarutiginissaannut isornartorsiunissamullu annilaangasarput, sulisartut kattuffianit oqaatigineqarpoq.
Mærskip Tuluit Nunaanni immikkoortoqarfiani pisortap Martine Rune Pedersenip uuliasorfinni sulisut isornartorsiunerat akerlilerpaa.
- Uuliasiorfinni sulisunik isumannaallisaanermut ernumassuteqartunik ilisimasaqanngilanga, Martin Rune Pedersen oqarpoq, nangillunilu:
- Mærskip politikkianut tamanna ilaanngilaq. Sulisugut oqaluttuuttarpagut sunaluunniit oqalluttuarisinnaagaat kajumisaartarlugillu pissutsit pillugit oqaluttuassasut.
Mærskip Tuluit Nunaanni immikkoortortaqarfiani pisortap sulisartut kattuffiat attaviginiarpaa, unnerluussisutigineqartut paasiniassallugit. Nutaarsiassaqartitsivik Ritzau taamatut allaaserisaqarpoq.