Uuliasioqatigiiffissuup Nunatsinni allaffeqarfini matuaa
Uuliamik nassaarnissamik takorluugaq taamaatinneqanngilaq, piffissamili tullermi sivisuumi qillerisoqartussaatinnagu Cairn Energyp Nuummi allafeqarfimminik ammatitsiinnarnissaa isumaqarpallaanngilaq.
Allattoq Jonas Løvschall-Wedel, Simon Uldum
maajip 13-at 2014 12:43
Cairn Energy Nunatsinni 2014-imi qillerinianngitsoq ilisimaneqareerpoq. Tamannalu pissutigalugu Nuummi allaffeqarfia qaammatit tulliuttut pingasut ingerlanerini matusussanngorpoq.
Allaffeqarfimmi sulisorineqartut marluusut allamik suliffissarsiortussanngorput. Sulisup aappaa isumaqatigiissummi naanissaata tungaanut atorfeqaannassaaq, aappaalu Royal Arctic Linemi siulersuisunut siulittaasunngortoq, Kuno Fencker, atorfimminit soraarsinneqarpoq.
Cairn Energylli KNR-imut erseqqissaatigaa Kalaallit Nunaat taamaatinneqassanngitsoq, Nunattalu avannaata-kitaata sineriaata avataani misissuiffissami Pitumi misissuisoqarnera suli isumalluarfigineqartoq.