Uuliarluertut politiit ujarpaat
- Pisoq tamaat qulaajarlugu paasiniartariaqarparput, arlaat eqqartuussivilersuussutaasinnaasumik iliuuseqarsimanersoq. Tassami saliinermut atatillugu kina akiliisinneqassanersoq aamma paasineqartussaavoq, Ilulissani politiit ittuat Karl Vinther oqarpoq, naatsorsuutigaalugu misissuineq sapaatip akunnerata missaanik sivisussuseqassasoq.
Anartarfiit imaannik milluaat marlunngornermi unnukkut Ilulissani imaanut maqitsivoq isumaqarluni tankip imaa anartarfiit imarigaat. Kingusinaareerlutilli paasivaat uuliakoq 5.000 literi maqissimallugu.
- Pisumut attuumassuteqartut tamaasa attaveqarfigissavagut killisiorlugillu. Inuit ilaat pissarsiariuminarnerupput, suliamullu atatillugu ilaasa namminneq ornittarpaatigut. Aammali ilaqarput illoqarfitsinniinngitsunik, taakkualu maanga tikeqqinnissaannut utaqqimaartariaqarpagut, imaluunniit allat killisiuinermik suliaqartittariaqassavagut, Karl Vinther.
Ilulissani sillimaniarnermut upalungaarsimasut uuliakumik mingutsitsiffiusoq marlunngormalli salillugu aallartippaat. Anartarfiit imaannik kueraavimmit uuliakoq 5.000 literi marlunngormat maqinneqarpoq. Sillimaniarnermut upalungaarsimasut pisortaata tullersortaa Bjarne Gregersen nassuiaavoq maannamut imaq uuliakumik akulik 24.000 literi katersorneqareersoq, pitsanngoriaatinillu maanna takusaqarsinnaalerlutik.
Uuliarluernermut akisussaasunik ujarlerneq politiit ingerlatileruttorpaat.
- Akisussaasumik tikkuaanissaq maannangaaq mianeraarput, tassami inunnut ataasiakkaanut suliffeqarfiilluunniit inatsisaatsuliorsimasutut akiliisitaanermillu kinguneqarsinnaasumik iliuuseqarsimasutut nalilerneqarneq kinguneqarnerlussinaavoq. Pasilliuteqassagutta pingaaruteqarluinnarpoq suliap qularnaatsumik naammasseqqaarneqarnissaa, Karl Vinther oqarpoq.
