Uuliaqarsinnaanera nalilersuisartut qiimmattaatigaat

Uuliaqarfiusinnaasunik nassaarneq nunani allani aningaasarsiornikkut nalilersuisartut qiimmattaatigaat.

- Tamanna Cairn Energyp Kalaallit Nunaannik, imaluunniit eqqornerusumik kalaallit pisuussutaannik pitsaanerusumik paasinnilersimaneranut takussutissaavoq. Taama Bank of Americap aningaasalersuisarnermut immikkoortortaanit  nipilimmik oqartoqarpoq, ippassaq Skotsit suliffeqarfiutaanniit, sioqqanik qaleriiaannik uuliaqarfiusinnaasunik nassaarsimaneq saqqummiunneqareersorlu.

Taamaattorli susassaqarfimmi danskeq immikkut ilisimasalik Radioaviisimut silatusaarnissamik kaammattuuteqarpoq, nassaarsimanerli Cairn Energyp ukiut aappassaani Kalaallit Nunaata imartaani qillerinerani "neriunartoqarnerpaajusoq" oqaatigalugu.

Aammattaaq nunat tamalaat akornanni aningaasarsiornikkut nalilersuisartunit taama ullumi nalunaartoqarpoq, naak Cairn Energyp siusinnerusukkut ujaasinermini nalunaarutigisartagai pakatsinartut pissutigalugit ukiup ingerlanerani aktie-t piginneqataassutit nalingat appariarujussuarneranik kinguneqartarsimagaluarmata, taamaattorli taakku silatusaarnerunatik qiimmattarnermik pissuteqarput.

- Sioqqanik qaleriaannik qaffasissunik pitsaassusilinnik siullerpaamik nassaarsimaneq nutaarsiassaavoq ulloq manna tikillugu neriunaateqarnersaasoq. Aammattaaq tamanna uuliavimmik nassaarnerunngikkaluarpat, Richard Rose, Oriel Securitymeersoq aviisimut Herald Scotlandimut oqarpoq.

Aviisip nalunaaruteqarnera naapertorlugu aasap ingerlanerani Cairn Energyp qillerini pingasuusut katillugit tamarmik immikkut 500 millionit koruuninik naleqarsimapput. Ukiuni kingullerni marlunni uuliasiorneq 5 milliardit koruuninik akeqarsimassagatinneqarpoq.

Qammatip naalernerani suliffeqarfiup ukioq manna qillerinini marluusut taamatittussanngorpai, tamatumalu kingorna inernerit misissoqqissaarneqariarlutik saqqummiunneqassapput ukiunullu tulliuttunut marlunnut pilersaarutit aamma saqqummiunneqassallutik.

Ukioq manna qillerinerit aallartinnerisa nalaannut sanilliullugit piginneqataassutit Cairnimeersut nalingi affaannanngorsimapput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat