Uuliamik qilleriunnaarneq suliffinnik annaasaqarfiussaaq
Cairn Energy Qeqertarsuup avataani uuliamik ujaasilluni qillerinerata nalaani, Aasianni umiarsualivimmi sulisut 20-nik ilaneqarput, tamannalu Aasianni suliffissaqartitsinermut iluaqutaalluni.
Cairn Energyp nunatta kitaani aappaagumiit sajuppillatitsilluni missisuineq kisiat suliarissappagu umiarsualivimmi sulisut 20-t suliffissaarutissaapput.
Cairn Energy Nuup avataani 200 kilometerisut avasitsigisumi qilllerimmat, Nuummi umiarsualivimmi Royal Arctic Havneservicemi sulisut 15-it sulisorineqarput, taakkua aasaru suliffissaarutissasut Taatsitannguaq Olseipn oqaatigaa.
Cairn Energy Qeqertarsuup avataani uuliasiorluni qillerimmat Aaasiaat Transportip iluaqutigaa. Taanna atortunik pisivoq Cairn Energyp atortuisa assartorneqarnissannik atugassanik.
- Atortut suliamut atugassatut pisiatta ukiuni amerlanerusuni akilersornissaannik tamanna kinguneqassagunarpoq, kisianni ajussanngilaq isumalluarpugullu. Kisianni aningaasaqarnitsigut malugissavarput, Aasiaat Transport Aps-imi pisortaq Jens Christensen oqarpoq.
Taanna oqaluttuarpoq, Cairn Enegyp sullinneranut atatillugu inuit arfinillit Aasiaat Tranportimi sulisut, oqatigiumanngilaali, anigaasanik qanoq amerlatigisunik annaasaqassanganerlutik. Nangipporlu:
- Cairn Energymeersut Aasiannukassaaraluarpata ajutoorunnangilagut, annassaqqarpugut - aamma uuliasiortut allat tikinnissaannik neriorsuisoqareermat, Jens Christiansen oqarpoq.
