Uuliakoortoqarnissaa DMI-mit sillimaffigineqarpoq
Uuliakoornermi saliinernut pilersaarusiornissamut atorneqartussamik, alapernaarsuummik nutaamik ineriartortitsimalluni, Erik Buch DMI-mi immikkoortami pisortaq tulluusimaarluni unnersiorpoq.
Qeqertaaluup kangerliumarngani uuliasiornissamut akuersissuteqartut Aatsitassanullu pisortaqarfiup peqqusinerisigut, uuliakoortoqarneratigut uuliap siaruarneranut uuttortaammik ineriartortitsivugut, Erik Buch oqarpoq.
Uuliakoortoqarnerani saliinissamut taakkua pingaaruteqarput, pisortat uuliasiortitsiviillu uuliakoornermik saliinissaamut pilersaarusiornerinut paasissutissaammata, Erik Buch DMIp nittartagaani taamatut issuarneqarpoq.
Nunatta imartaani uuliakoortoqassagaluarpat, uuliap immami ingerlaarfigisinnaasaanik DMI nalunaaruteqartarniarluni neriorsuivoq. Tamanna pisinnaalluni uuliakoornermit minutsit 15-it qaangiunnerannit.
Uuliakoornermi uuliap immami ingerlaarnera uuliallu tissornera pillugu paasissutissanik DMI nalunaaruteqartarniarpoq.
Umiarsuaq uuliakoorpat, uuliakoorfigisaa DMI-mit paasineqarsinnaavoq, DMI-millu nalunaarutigineqarpoq, uuliakoornerit pillugit paasissutissat ukiut tulliuttut ingerlaneranni ineriartortinniarneqartut.