Aqqaluk Lynge: Utoqqatserneq annernanngilaq
Meeqqanut misileraanermi aallartinneqarsimasunut politikerit kalaallit qallunaallu utoqqatsertariaqarput, tamannami eqqortuliornerussaaq, Kalaallit Nunaanni ICC-imi ukiorpassuarni siulittaasuusimaasoq, Aqqaluk Lynge oqarpoq.
Kalaallit 1950-kkunni misileraatigineqartut pillugit Kalaallit Nunaanni ICC-imi siulittaasuusimasoq, Aqqaluk Lynge ukiut 10-t matuma siorna utoqqatsertoqarnissaanik piumasaqarluni siunnersuuteqarpoq.
Ullorli manna tikillugu utoqqatsertoqannginnera alianartoq, Aqqaluk Lynge isumaqarpoq.
- Utoqqatsersinnaaneq sooq taama paamaarunneqartiginersoq paasisinnaanngilara - isumaqarpungami piffissanngortoq, utoqqatsernermi annernanngilaq, pisimasullu qaangerniassagutsigit pisoq pillugu iliuuseqartoqartariaqarpoq, Aqqaluk Lynge oqarpoq.
Eqqugaasut arfiniliinnanngortut
Meeqqat angajoqqaaminnit arsaagaallutik 1950-ikkunni misileraanermi Danmarkiliartinneqartut 22-upput, taakkunani ilaavoq Helene Thiesen 74-nik ukiulik - taanna isumaqarpoq naalagaaffiup utoqqatsernissaa piffissanngorluinnartoq.
- Utoqqatserfigineqarnissarput piariaqarpoq, uannuinnaanngitsoq massakkummi arfiniliinnanngorpugut, taamaattumik taama ikitsigileraluarluta utoqqatserfigineqassagutta uagutsinnut isumalerujussuussaaq, aamma paasisinnaanngilarput sooq utoqqatsertoqarsinnaannginnersoq, Helene Thiesen oqarpoq.
- Misileraanermi eqqugaasut ikittuinnanngorput, ajortumillu pineqarsimanerat ajorpoq, taamaattumik utoqqatsissummik iluameersumik oqaaseqartoqartariaqarpoq, tassa nunatsinni naalakkersuisut suliassaq tigusariaqarpaat - danskillu oqaloqatigalugit, ICC-mi siulittaasuusimasoq, Aqqaluk Lynge oqarpoq.
