Utoqqarnut ikiortarialinnullu kommunit aningaasartuutaat assigiinngillat

Nunatsinni utoqqaat allallu angerlasimaffimminni ikorneqartartut angerlarsimaffimmi ikortaasa amerlassusaat, kommunimit kommunimut assigiinngitsupilussuusut kisitsisit Radioaviisimit paasisatta takutippaat. Aamma utoqqarnut allanullu ikiortarialinnut kommunit aningaasartuutaat assigiinngillat.

Kommuni Kujallermi angerlarsimaffimminni ikiorneqartartut 90-it missaanniipput, taakkununnga agguaqatigiissillugu inoqutigiinnut ataatsimut aningaasat 92.000 koruunit ukiumut kommunimit atorneqartarput. Qeqqata Kommunianili angerlarsimaffinni ikiorneqartartunut 192-iusunut agguaqatigiissillugu inoqutigiinnut ataatsimut aningaasat 33.000 koruunit ukiumut taamaallaat atorneqartarlutik. Tassa Kommuni Kujalleq Qeqqata Kommunianut naleqqiullugu pingasoriaammik aningaasartornerusarluni.

Qaasuitsup Kommuniani inoqutigiit 455-it angerlarsimaffimminni ikiorneqartarput, kommunip taakkununnga aningaasat atortagaat agguaqatigiissillugu 43.000 koruunit ukiumut atorneqartarput. Kommuneqarfik Sermersuumi inoqutigiit 255-it ikiorneqarnerannut agguaqatigiissillugu ukiumut aningaasartuutaasarlutik 44.000 koruunit. Tassani maluginiarneqassaaq Kommuneqarfik Sermersuumi angerlarsimaffimmini ikiorneqartartut Qaasuitsup Kommunianut naleqqiullugit ikinnerujussuummata.

Angerlarsimaffinni ikortip ataatsip inoqutigiit qassit sullittarnerai, kommunimit kommunimut aamma assigiinngitsuupput.

Kommuneqarfik Sermersuumi Kommuni Kujallermilu angerlarsimaffimmi ikortip ataatsip angerlarsimaffiit arfinillit sullitarisarpai, Qaasuitsup Kommuniani Qeqqata Kommunianilu angerlarsimaffimmi ikortip ataatsip inoqutigiit arfineq pingasut sullittarisarlugit.

Kalaallit Nunaanni Utoqqaat Kattuffiata siulittaasua, Ole Kreutzmann Radioaviisimut qanittukkut oqaatigaa, utoqqaat allallu angerlarsimaffimminni ikiorneqartarnerinut aningaasartuutit kommunimiit kommunimut assigiinngeqisut assigiilertariaqartut.