Utoqqalinersiallit: 750 koruunit qaammammut iluaqutaassaqaat
Tamanna Qeqqata Kommuniani utoqqaat siunnersuiusoqatigiivisa innarluutillillu kattuffiata nuannaarutigeqaat.
- Tusaqqaarakku oqartariaqarpunga tusarluarnaqaaq. Annertunngikkaluarpoq kisianni taamaalilluta utoqqaat eqqarsaatigineqarnerput erseqqinnerulerpoq, aamma neriuttorujussuuvunga taanna qaffaat kingusinnerusukkut aamma qaffaallattaalerumaartut uku akit ilaatigut qaffariataartartut akissaqartinniassagutsigit, Qeqqata Kommuniani utoqqaat siunnersuisoqatigiivini siulittaasoq, Bolethe Skifte taama oqarpoq.
AAMMA ATUARUK Partiit sisamat aningaasanut inatsit pillugu isumaqatigiittut
Utoqqalinermi soraarnerussutisiallit ukiumut akileraartinnatik 64.239 koruunit akissarsiarisarpaat. Aappaagumiilli akileraarutit sioqqullugit 9.000 koruuninik, tassa qaammammut 750 koruuninik, qaffassapput.
Utoqqaat utoqqaat illuanni najugallit qaammammut pisartagaat akileraartinnatik 214 koruuninik qaffanneqassapput.
Aamma siusinaartumik utoqqalinersiallit ukiumut aningaasarsiaat akileraarut peereernagu 5.660 koruuninik qaffaavigineqarnissaat isumaqatigiissutigineqarpoq.
Siusinaartumik utoqqalinersiutisiallit ulloq unnuarlu angerlasimaffinni najugallit akileraartigatik qaamammut pisartagaat 592 koruuninik qaffassallutik.
Siusinaartumik utoqqalinersiutisiallit kiffaanngissuseqarnerulissapput
Tamanna nunatsinni inuit innarluutillit kattiffianni siulittaasup, Cecilie Marie Jakobsenip nuannaarutigeqaa:
- Iluaquterujussuunissaa naatsorsuutigaara pissutigalugu uku pisartagarisaat ulluinnarnut naammanneq ajoramik. Ilaquttaminnik tapersersorneqarluanngikkunik amigartuulaaginnaavittuartaramik saniatigullu angajoqqaatik toqqammavigisinnaasarlugit ilaasalu angajoqqaavi aamma utoqaalinersiaqaannartarlutik, Nunatsinni inuit innarluutillit kattiffianni siulittaasoq, Cecilie Marie Jakobsen KNR-imut taama oqarpoq.
