Utoqqaat sullinneqarneranni pingaarnersiuisariaqarsinnaasarput
- Sulisussaaleqineq ajornartorsiutigigatsigu, inuttassaaleqisaratta sulisussarsiorluta. Taava sulisussanik amigaraangatta, taava suliassagummi amerlammata taava ullormut suliassat pingaarnersiulertarpavut, pisariaqartitsinerit siulliullugit, taava ukua pisariaqartitsinnginnerit kingulliunniarsarisarpavut, Tina Evaldsen, Kommuneqarfik Sermersuumi Isumaginninnermut, Suliffeqarnermut Inuussutissarsiornermullu immikkoortortaqarfimmeersoq, oqarpoq.
Utoqqaat innarluutillilluunniit angerlarsimaffimminni ikiorneqartartut assigiinngitsutigut ikiorneqartarput, assersuutigalugu uffartinneqartarlutik, eqqiaasoqartarluni assigisaanillu.
Utoqqaat, innarluutillilluunniit angerlarsimaffimminni taamatut ikiorneqarnissaminnut pisariaqartitsisut sullinneqarnerat ilaatigut ajornartorsiorfiusinnaavoq, sullissisut napparsimakulasarnerat ilaatigut pissutaalluni suliassanik pingaarnersiuisoqartariaqarsinnaasarmat.
Ikiorneqarnissaminnut pisariaqartitsisut ullut 14-it tikillugit ilaatigut utaqqisinnaasariaqartarput, isumaginnittoqarfimmi sulisussaaleqisoqarsinnaanera pissutaalluni, tamannalu soorunami ajuusaarnartoq, Tina Evaldsenip oqaatigaa:
- Soorunami pissusissamisuunngilaq, aamma naammaginanngilaq, aamma utoqqaat innarluutillit tamaavimmik, imaluunniit kikkulluunniit pisariaqartitsisut angerlarsimaffimmi ikiortimik aalajangiiffigineqarnikut akuerisaanikut, soorunamili taakku neriorsuutit pinngitsoornata tunniuttariaqarpavut, Tina Evaldsen, Kommuneqarfik Sermersuumeersoq oqarpoq.
Sulisut tamarmik suliartortartuuppata ajornartorsiutaanavianngikkaluartoq, taassuma erseqqissaatigaa, erseqqissaatigaluguttaaq sulisut suliffimmi atukkat pillugit paasiniaavigineqartartut, atukkat taamaaliornikkut pitsanngorsaaviginiarneqartartut oqaatigalugu:
- Soorunamili akuerisinnaanngilarput inunnik napparsimakulasunik sulisoqarutta, taava sulisut oqaloqatigalugit paasiniartarparput sunaana pissutaalluni napparsimakulasut, suliffiup iluani atugassarisat taakku pissutaanersut apersuutigisarpavut, taava paasiniarlugu suliaq tassunga suliffimmut ilumut naleqquttuunersoq, imaluunniit naleqquttuunnginnersut, Tina Evaldsen, Kommuneqarfik Sermersuumi Isumaginninnermut, Suliffeqarnermut Inuussutissarsiornermullu immikkoortortaqarfimmeersoq, oqarpoq.
