Utoqqaat pitsaanerusunik atugaqalissapput
Sanaartornermut aningaasanit pissamaatinit 51 millionit koruuninik immikkoortitsisoqarnissaa Aningaasaqarnermut ataatsimiititaliamit akuersissutigineqaqqullugu Naalakkersuisut maanna qinnuteqarput, puiguttorsimasunut immikkut aningaasaliisoqarnissaa aamma qinnuteqaatigalugu.
Suliniutit kommunini pingasuni, tassa Kommune Kujallermi, Qeqqata Kommuniani aamma Qaasuitsup Kommuniani ataatsimut suliniutigineqassapput, aningaasartuutit kommuninit pineqartunit Namminersorlutillu Oqartussanit 2014-ip tungaanut aamma avinneqassallutik.
Kommune Kujalleq utoqqaat illussannik nutaamik Qaqortumi sananiarpoq, puiguttortunut immikkoortortalimmik Sisimiuni utoqqaat illuata allineqarnissaa Qeqqata Kommuniata isumaginiarpaa, Qaasuitsullu Kommunia puiguttortunut Ilulissani angerlarsimaffiliorniarpoq aamma Aasianni Qaanaamilu nutaamik utoqqarnut illuliornissaq isumaginiarlugu.
- Pilersaarutit piviusunngorsinnaappata utoqqarpassuit pitsaanerusumik atugaqalissagaluarput. Sanaartornerit aallartippatta suliffissaaleqisorpassuit aamma suliffissaqalissagaluarput, Naalakkersuisoq Jens B. Frederiksen, oqarpoq.
