Utoqqaat Nuummi piartortut hospice pisariaqartissanngilaat

Nuummi Utoqqaat Illuanni utoqqaat massakkut 46-ut najugaqarput. Ukiup ataatsip ingerlanerani najugaqartut 10-15 missaaniittut toqusarput. Piartornerminni ilinniarsimasunit piartortunillu sullissinermik sungiussisimalluartunik paaqqutarineqartarput. Nakorsanit, peqqissaasunit immikkullu ilinniarsimasunit ikortinit piartortut sullinneqartarput. Piartortunut ilaqutaasut aamma oqaloqatiginissaanut sullinnissaanullu Utoqqaat Illuanni sulisut sungiussilluarsimasut, ukiut 14-it Utoqqaat Illuani ningiuusoq Rosemarie Elsner nassuiaavoq.

Nuummi hospiceqalissappat Utoqqaat Illuani najugaqartut piartornerminni nuunneqartarnissaat ningiuusup ilimaginngilaa:

- Utoqqaat Illuaniit nuunneqartariaqanngillat, tamaanimi eqqissisimallutik angerlarsimaffeqarput sulisullu ilisarisimalluarlugit. Hospicetaaraluaruttaluunniit piartornerminni nuuttarnissaat pisariaqanngilaq. Uagut piffissaqarfigaavut. Immikkorluinnaq paaqqutarineqartarput. Ilaqutaasut oqaloqatigisarpagut aamma immikkut pisariaqartitsiffiini. Malittarilluarneqartarput. Toqu qanillippat peqqissaasoq suliartortarpoq sulisoqaannaavittarporlu. Assistemik immikkut ilinniarsimasumik unnuarsiortoqartarpoq, aamma ullukkut assistenteqartarpoq. Peqqissaasut arlaqarpugut assistenerpassuuvugut sulisullu ilinniarsimasut ukiut arlallit sulisuunikuupput. Nakorsaq ullut tamangajaasa oqaloqatigisarparput nipaallisaatillimmi taakkua aquttaramikkit. Iluaqutaanngippat nakorsaq aggertarpoq. Toqujartortup piumaguni imaluunniit ilaqutaasup piumasarippagu aamma napparsimavimmut unissinnaavoq, taama Rosemarie Elsner oqarpoq.  

Utoqqaat Illuani ineqartoq piartortoq paasinarsigaangat qanoq periuseqartoqassanersoq naluneqarneq ajorpoq, toqqissisimasunillu avatangiiseqarluni piartorneq ajunnginnerpaajusarpoq. Ulluinnarni sulisut nalunngisat piartornermi ikiortigineqarnissaat toqqississutaasarluni.

Naak Utoqqaat Illuanni sulisut piartortunut sullissinermut ilinniarsimallutillu misilittagaqarluaraluartut, piartortut Utoqqaat Illuani najugaqarsimanngitsut inissinneqartalissappata, tamanna Utoqqaat Illuani najugaqartup tulluussorinngilaa.  

- Utoqqaat Illuani hospiceussanngilaq. Uanga tassa isumaga, maanga toqujartortoqarsinnaanngilaq. Utoqqaat 46-ut maani angerlarsimaffeqarput taavalu hospicenngussagutta taava utoqqartagut tamanna artussavaat. Najugaqartut ilaat toqugaangat tamanut alianartarpoq. Toqusoqaraangami annittussaallugulu tussiarfigisussaallugulu sivisoorujussuarmik aliasuttarpugut. Inuppassuit toqujartorlutik maannartalissappata tamanna Utoqqaat Illuanni nuanniitsumik malugisorujorujussuussavarput. Isumaqarpunga tamanna tulluanngitsoq, Utoqqaat Illuanni ningiuusoq Rosemarie Elsner oqarpoq.