Utoqqaat illuat ukioq manna suliffeqarfittut tarnikkut avatangiisigissaarnerpaatut toqqagaasoq
Suliffeqarfinni suliffeqarfimminnik tarnikkut avatangiisigissaarnerpaatut innersuussisimasut sulisuisa akornanni apeqqutinik immersuisitsinermi akissutigineqarsimasunik siunnersuisoqatigiit nalilersuinermik kingorna taama naliliipput. Suliffeqarfiit pingasut ukiormann peqataapput.
Apeqqutinik immersugassiaq atorlugu misissuinermi, suliffeqarfik pointinnannerpaasoq nersornaaserneqartarpoq. Sulisullu suliffeqarfimmi tarnikkut avatangiisitigut atukkatik pitsanngorsarniarlugit suliffeqarfiup qanoq iliortarnera namminneq allaaseralugu oqaluttuarisarpaat.
Kalaallit Nunaanni suliffigissaaneq pillugu siunnersuisoqatigiit tusagassiorfinnut nalunaarutaat naapertorlugu sulisut namminneq sullivimminnik nersualaarinninnerpassuisa takutippaat uppernarsarlugulu suliffeqarfik eqqortoq ajugaasutut toqqagaasoq.
Siunnersuisoqatigiinnit aamma oqaatigineqarpoq sulisut suleqatigiillutik suliffeqarfimminni ileqqussat naleqartitatik suliarisimavaat, ukiumullu marloriarluni sulisorisanik oqaloqateqartarneq atuuppoq, aammattaaq aaqqitassat sulisunit tikkuarneqartut iluarsiniarneqartarput. Minnerpaamik qaammammut ataasiarlutik sulisut tamarmik ataatsimiisinneqartarput, sulisullu naminneq piumassusertik atorlugu sammisassanik ingerlatsisinnaapput, naak tamanna sulisut ataasiakkaat suliassaattut allassimanngikkaluartorluunniit.
Suleqatigiit angerlarsimaffimmilu najugallit ukiumut arlaleriarlutik ataatsimut sammisassanik aaqqissueqatigiittarput, nereqatigiittarlutik, erinarsoqatigiittarlutik aliikkusersoqatigiittarlutillu.
Tamakkulu tamaasa eqqarsaatigissagaanni suliffeqarfik tarnikkut avatangiisigissaartoq pilersinneqarsimavoq, tamannalu utoqqaat illuanni sulisunut najugaqartunullu iluaqutaalluarluani, Kalaallit Nunaanni suliffigissaaneq pillugu siunnersuisoqatigiit tusagassiorfinnut nalunaaruteqarlutik taama allapput.
