Utoqqaat Illersuisuata naalakkersuisoq isornartorsioraa
Isumaginninnermut naalakkersuisoq, Martha Abelsen, Utoqqaat Illersuisuata iluarinngisaanik juulip qeqqata missaani oqaaseqaateqarpoq.
Abelsen naapertorlugu nunatsinni utoqqalinersiat agguaqatigiissillugit aningaasarsianut naleqqiullugit qaffasinnerupput.
Taamali naatsorsorneqarsinnaanngitsut, Helene Heilmann naliliivoq.
Utoqqalinersiat naleqqiussinermi qaffasinnerusut
Nunatsinni utoqqalinersiat Danmarkimi utoqqalinersianut naleqqiullugit koruuninngorlugit ikinnerusut, Martha Abelsen allappoq.
Innuttaasulli 2018-imi agguaqatigiissillugit aningaasarsiaannut naleqqiullugit nalilersuineq aallaavigalugu qaffasinnerusut, nangilluni allappoq.
- Pigissaarnermut naleqqiullugu, Kalaallit Nunaanni kisermaanut aappariinnullu pensionisiaqartitsineq Danmarkimut naleqqiullugu qaffasinneruvoq, Martha Abelsen paragraf 37 atorlugu apeqquteqaammut akissuteqarluni allappoq.
Nunatsinni utoqqalinersiallit kisermaat utoqqalinersiaasa nunatsinni agguaqatigiissillugit aningaasarsiat 256.000 koruuniusut 55 procentii assigigaat, Danmarkimi utoqqalinersiallit kisermaat utoqqalinersiaasa Danmarkimi agguaqatigiissillugu aningaasarsiat 327.000 koruuniusut 50 procentii assigigaat, Abelsen allappoq.
Taamali sanilliussineq atorsinnaanngitsoq, Utoqqaat Illersuisuat isumaqarpoq.
- Danmarkimi innuttaasut agguaqatigiissillugu isertittagaat nunatsinni isertinneqartartunit amerlanerujussuunerat pissutigalugu taamatut sanilliussineq naleqarneraanermut atorneqarsinnaanngilaq, Helene Heilmann allappoq.
AAMMA ATUARUK Inatsisartut siunnersuutinik aningaasaqarnernut sunniuteqarsinnaasunik isummertussat
Tamatuma saniatigut nunatsinni ineqarneq, nerisassat, angallannerlu akisunerummata nunatsinni inuuneq akisunerusoq, Helene Heilmann allappoq.
- Taamaattumik nunatsinni utoqqalinersiat Danmarkimi utoqqalinersianiit naleqarnerusutut oqaatigineqarsinnaanngillat, akerlianilli nunatsinni utoqqalinersiatut isertitat nunatsinni nalikinnerusut oqaatigineqarsinnaapput, Utoqqaat Illersuisuat allappoq.
Utoqqalinersiat pitsanngorsaaffigineqarnissaanik neriorsuisinnaanngitsoq
Martha Abelsenip taama naliliineranut suna pissutaanersoq eqqarsarnartippaa, patsiseqartorlu inerniliullugu.
- Naalakkersuisumit Martha Abelsenimit taamatut nalunaaruteqarneq ima paasineqarsinnaavoq, utoqqaat saniatigut isertitaqarsinnaanngitsut atugassarititaannik Naalakkersuisut pitsanngorsaanissamik pilersaaruteqanngitsut, Helene Heilmann allappoq.
Aningaasaqarnermut nalorninartut Covid-19-illu sunniutai pissutigalugit utoqqalinersianik pitsanngorsaanissaq Naalakkersuisunit neriorsuutigineqarsinnaanngitsoq, Martha Abelsen allappoq.
Utoqqaalli atugarissaarnerunissaat anguniarlugu utoqqarnut periusissiamut suliamut aallarnisaataasut aallartereeritsik, Martha Abelsen allappoq.