Utoqqaat aningaasaataat atornerlunneqartartut
Nalunaarusiaq nunap immikkoortortaani inunnik 500-nik misissuinernit tunngaveqarpoq, Yellowknifemilu utoqqarnik naalliutsitsisarnermut tunngasumik ataatsimeersuarnermi pingasunngormat saqqummiunneqarluni. CBC News taama allaaserisaqarpoq.
John Norbert, Tsiigehtchic-imi utoqqaat peqatigiiffianni siulittaasoq oqarpoq, atornerluineq utoqqaqatiminut ajornartorsiutaasoq, ilaqutaasullu ajornerpaamik atornerluisuusartut.
- Ataasiinnarmik sinittarfilimmik ineqaraluartut ilaqutaasa nuuffigiinnapajuttarpaat, ilaatigullu akiliutaat tiguinnariarlugit aningaasaataannik arsaartortarlugit, John Norbert oqarpoq.
Aningaasatigut atornerluinerup saniatigut, ataatsimeersuartitsinikkut utoqqarnik misigissutsikkut oqaatsitigullu naalliutsitsisarneq utoqqarnillu sumiginnaaneq akiorniarneqarput.
- Utoqqaat 5-10 procentiisa inuunermik ilaanni utoqqarnik naalliutsitsineq misigisassagaat Inuvialunni naatsorsuutigineqarpoq, Angus Mackay, North West Territoriami utoqqaat peqatigiiffiannit oqaaseqartartoq oqarpoq.
- Uppernarsaatit ataqatigiissaarneqanngitsut aallaavigalugit, naalliutsitsineq avannarpasinnerusumi atugaanerusoq eqqoriarneqarpoq.
Nalunaarusiami aamma misissorneqarsimavoq utoqqarnik sooq naalliutitsisoqartarnersoq, avinngarusimaneq, ilaqutariittut ataqatigiinnginneq atornerluinermillu akuerinniinnarneq misissuinermi ilaatigut patsisaanerarneqarlutik. Nalunaarusiami siunnersuutigineqarpoq utoqqaat tapersersoqatigiiffissaminnik pilersitsissasut, suleqatigiiffissanik akuttunngitsumik ataatsimooqatigiiffissanik, sammisaqartitsinernik pilersitsisoqassasoq, utoqqarnik naalliutsitsinernik pinaveersaartitsisussamik, kiisalu iliuuseqartartussanik neqerooruteqartoqassasoq.
