Utaqqisut affaannanngorput

Siffissamikkut seeqqumikkullu suliaritittussat 2010-mut naleqqiullugu affaannanngorsimapput. Isimikkut suliaritinniarlutik utaqqisut amerlassusaat aamma appartinneqarsimapput.

Tamanna inuiaqatigiinnut nutaarsiassaavoq nuannersoq.

Siffissammi seeqqullu nungullarsimasut annernartuupput. Tappiutikkullu ajoquteqarnerup inuuneq ajornakusoortilersarpaa.

Taamaattumik nappaatinik nalinginnaasumik atorneqartartunut taakkunannga suliaritinniarluni utaqqinerup appartinneqarnera tamanut pitsaasuuvoq.

2010-imi siffissaminnik suliaritittussat agguaqatigiisillugu ukiut pingasut utaqqisariaqartarput. Utaqqinissaq maanna qaammatinut 16-inut appartinneqarsimavoq aamma seqqukkut suliaritittussanut taamaappoq.

Isimikkut suliarittussanut utaqqineq siorna qaammatit 20-ngajaapput. Aningaasaliiffigeqqinneratigulli pilersaarusiorluarnikkullu utaqqinissaq ukiup affaannanngortinneqarsimavoq.

Peqqinnissamut naalakkersuisup Steen Lynge taama ingerlasoqarnera nuannaarutigaa.

- Utaqqisoqartarnerujussua atorunnaarsikkusussimavarput, Inatsisartullu aningaasaliisimapput. Taama suliniuteqarnerup kinguneqarluarnera takussutissaqalerpoq, Steen Lynge oqarpoq.

Politikkikkut anguniangaavoq utaqqisariaqartarnerit agguaqatigiisillugit ukiumut ataatsimut appartikkusussimavagut. Tamanna inuiaqatigiit aningaasaqarnerannut aamma iluaqutaassooq. Utaqqinerimmi ullorpassuarni napparsimanernik kinguneqartarput, isumaginninnikkullu aningaasartuutitigut qaffassaasarlutik.

Peqqissutsimut Naalakkersuisoqarfimmili nassuerutigineqarpoq utaqqisut pillugit ajornartorsiutit tamarmik aaqqiivigineqanngimmata.

Naalakkersuisoqarfik naapertorlugu peqqutaavoq amerlanerit suliaritittariaqarnerat. Tamatumunnga peqqutaavoq inuit sivisunerusumik inuusalersimanerat, taamaalillunilu amerlanerusut nappaatinut amerlanernut suliaritittariaqartarnerat, Peqqissutsimut Naalakkersuisoqarfik allappoq.