Utøyamut eqqaassutissiaq uleerneqartoq
Eqqugaasut atii ukiuilu ikkaami eqqaassutissiami allaqqapput. Eqqaassutissiami nateq ilaatigut igalaaminernik sanaajuvoq.
Natermi igalaamerngit igalaaminernut naalakkersuisoqarfiit 2011-mi saassussinermut atatillugu qaartoqareernerani eqqaanniittunut assersuutaapput.
Lisbeth Røynedahlip, paniminik saassussinermi annaasaqartup, eqqaassutissap kiisami naammassineqarnera nuannaarutigaa.
- Sivisuumik naammassineqarniarsarivoq. Saassussinermit ukiut arfineq-marluk qaangiutereerput, naalagaaffiulli pigisaanik kiisami eqqaaniaasarfeqalerpugut. Tamanna nuannaarutigaara, Lisbeth Røynedahl norskit nutaarsiassaqartitsiviannut NTB-mut oqarpoq.
Anders Breivik siullermik Oslomi qaartartumik 950 kiilumik oqimaassusilimmik qaartitsimmat, tullianilu politiitut atisaqarluni Arbeiderpartiip inuusuttaannut qeqertami Utøyami politikkikkut aasakkut aaqqissussamut saassussimmat, inuit katillugit 77-it toqutaapput, 90-illu ikiligaallutik.
/ritzau/