Pompeop Irakimi sakkutooqarfimminnut saassusseqqittoqarnera assuarigaa
USA-p nunanut allanut ministeriata, Mike Pompeop, amerikamiut Irakimi sakkutooqarfiisa ilaata qaartartunik igeriuttakkanik saassunneqarluni eqqorneqarnera assuaraa.
- Irakimi sakkutooqarfiit ilaata saassunneqarnera kamaatigaara. Irakip namminersortuunerata innarlerneqarnera unitsinneqartariaqarpoq, Pompeo, Twitterikkut ilaatigut allaaserisaqarpoq.
Kikkut ippassaq sapaammi saassussisuunersut suli ilisimaneqanngilaq. Islamisiortut Iranimeersut saassussisuusimanissaat, USA-p siusinnerusukkut pasilliutigereerpaa. Nutaarsiassaqartitsivik Reuters taama allaaserisaqarpoq.
Irakip sakkutuui sisamat sakkutooqarfimmik Al-Baladimik saassussinermi aqqunartiterput. Sakkutooqarfik taanna Irakip illoqarfiisa pingaarnersaata Bagdadip avannaani inissisimavoq.
Amerikamiut sakkutuui timmisartortartut ilaat tassani inissisimanikuupput, USA-li Iranillu akornanni najummassimanartorsiortoqarnera pissutaalluni sakkutooqarfimmit tassannga qimagussorneqareerlutik. USA-mi illersornissaqarfik taama nalunaaruteqartoq, nutaarsiassaqartitsiviup AFP-p allaaseraa.
AAMMA ATUARUK Irakimi sakkutooqarfik Iranimiunit saassunneqartoq
Iranimiut qaartartut igeriuttakkat atorlugit amerikamiut Irakimi sakkutooqarfiinik marlunnik sapaatip-akunnerata siuliani saassussipput. Sakkutooqarfiit marluk taakku USA-mit Danmarkimiillu sakkutuuliiffigineqarput.
Sakkutuut nunanit allaneersut arlaannaalluunniit saassussinermi ajoquserneqanngillat. Irakimili pissutsit ernumanartutut nalilerlugit, Danmarkip Al-Asadimi sakkutooqarfimmi sakkutuumi amerlanersaat Kuwaitimut kingorna nuunniarlugit aalajangerpaa. Danmarkip sakkutuui 30-40-t suli sakkutooqarfimmiipput.
Irakimi sakkutooqarfiup saassunneqartup sakkutooqarfillu alla kurderit Irakimi namminersorfiisa ilaanni Erbilimi inissisimasoq saassunneqarnissaat Iranip Irakimut aarlerisaarutigisimagaa saassussisoqareernerata kingorna ilisimatitsissutigineqarpoq.
Iranimiut oqarnerat naapertorlugu saassussinerit amerikamiut Iranimi sakkutuut Qudsikkut naalagaanertaannik, Qassem Soleimanimik, toqutsinerannut akiniaaneruvoq.
