Politikki Avatangiisit

Naliliisartoq: Pituffik pillugu isumaqatigiissutip allanngortinneqarnissaa ilimananngilaq

Pituffik pillugu isumaqatigiissummik USA-p allannguimanissaa ilimananngilaq. Kalaallit Nunaannili sakkutooqarfiusimasunik saliinissaq periarfissaasinnaassasoq, Illersornissamut ilinniarfimmi nalilersueqqissaartartoq naliliivoq.

Allattoq Helle Nørrelund Sørensen

septembarip 09-at 2016 05:19

Nutserisoq Erna Lynge

Illersornissaq pillugu USA-mik isumaqatigiissut Naalagaaffeqatigiit isumaqatigiinniutigeqqittariaqarpaat - imaluunniit minnerpaamik ilanngussaqarlutik.

Inatsisartut Nunanut allanut sillimaniarnermullu ataatsimiititaliaa taama isumaqarpoq. Taamatulli oqaannarneq ajornartoq Johannes Riber Nordby isumaqarpoq, taanna Danmarkimi Illersornissamut ilinniarfimmi nalilersueqqissaartartuuvoq.

- Isumaqatigiissummik amerikamiunik isumaqatigiinniaqqinniaraanni amerikamiut paasiteqqissaartariaqarput sooq nutaamik isumaqatigiissusiortoqartariaqartariaqarnersoq. Pituffik eqqarsaatigalugu amerikamiut nutaamik isumaqatigiinniuteqarusunnavianngillat, suna nutaartarissaneraa takusinnaanngikkunikku.

Aamma atuaruk USA-mut nutaamik isumaqatigiissusiornissaq ataatsimiititaliap piumasaqaatigigaa

Piumasaqaatit ilagivaat USA Kalaallit Nunaanni sakkutooqarfigisimasamini saliisariaqartoq. Johannes R. Nordby isumaqarpoq tamanna ajornavissuunavianngittoq:

- Saliinissaq eqqarsaatigalugu amerikamiut iluasaariaannaapput.

Sakkutooqarfiusimasunimi saliineq amerikap sillimaniarnermut politikkianut attuumassuteqanngilaq. Ilutigitillugulu USA siusinnerusumut naleqqiullugu silap pissusaanut avatangiisinullu mianerinnittutut saqqumerusuppoq. Aammalu saliineq naalagaaffeqatigiinnut pitsaasumik attaveqarnermik qulakkeerinninnertut taaneqarsinnaammat.

- Siunissami ukiut 20-25-it qaangiuppata imaassinnaavoq Kalaallit Nunaat USA'p sillimaniarneranut pingaaruteqarnerulersimassasoq. Saliiumanngikkunimmi ukiut 30-it qaangiuppata kalaallinut ikioqqugaluarunik imaassinnaavoq itigartinneqartut.

Aamma atuaruk USA-mut nutaamik illersornissamut isumaqatigiissuteqartoqassanngilaq

Akerlianit Pituffik pillugu akiliisitsisalernissaq siunertaralugu nutaamik isumaqatigiissusiornissaq ajornarnerujussuussaaq.

- Naalagaaffeqatigiit akiliisitserusulerpata amerikamiut oqarsinnaapput, ajunngilaq taava uagut aamma Pituffimmi sanaartorlutalu qanorluunniit iliorusuppugut. Tamannalu imaassinnaavoq danskinut kalaallinulluunniit akueriuminaassinnaasoq, nalilersueqqissaartartoq oqarpoq.

Danskit nunanut allanut tunngasunut ministeriata USA'p Kalaallit Nunaanniinnera pillugu nutaamik isumaqatigiissuteqartoqarnissaa marsimi itigartitsissutigaa.

Pisaq pillugu ministeri nutaamik oqaaseqartissinnaasimanngilarput.