USA-mut nutaamik isumaqatigiissusiornissaq ataatsimiititaliap piumasaqaatigigaa
Nunarput Danmarkilu USA-p Nunatsinni sakkutooqarfeqarnera pillugu ilassutitut nutaamik isumaqatigiissusiussapput imaluunniit illersornissaq pillugu isumaqatigiissut isumaqatigiinniutigeqqillugu.
Inatsisartut Nunanut Allanut Sillimaniarnermullu Ataatsimiititaliaat, Washington D.C.-mi amerikamiut sinniisaannik qullersanik arlalinnik sapaatit-akunnerata siuliani ataatsimeeqateqareerluni taama nalunaaruteqarpoq.
Ataatsimiititaliap aamma nunanut allanut naalakkersuisup Vittus Qujaukitsup USA-miinnerminni erseqqissaatigaat maanna isumaqatigiissutaasoq nunatta tungaanit naammagineqanngitsoq.
Inatsisartut Nunanut Allanut Sillimaniarnermullu Ataatsimiititaliaanni siulittaasoq, Justus Hansen, KNR-imut taama oqarpoq.
Aamma atuaruk Amerikamiut Pituffik pillugu suliami kukkunertik nassuerutigigaat
Pituffimmi sakkutooqarfimmi kiffartuussinissamik isumaqatigiissut amerikamiullu sakkutooqarfigisimasaanni eqqakkat qimaannarneqarsimasut pissutigalugit, illuatungeriit isumaqatigiinniaqqinnissaat ataatsimiititaliap isumaqatigiissup piumasaqaatigaa.
- Thule Air Basemi (Pituffimmi sakkutooqarfimmi, aaqq.) kiffartuussinissamik isumaqatigiissuteqartarnerit ersersippaat taamatut aaqqissuussisimaneq qajannarpallaartoq inuiaqatigiinnullu kalaallinut ataatsimut isigalugu killilerujussuarmik iluaqutissiisartoq. Taamaattumik Naalakkersuisut ilungersorlutik ataavartumik aaqqiiniarlutik USA peqatigalugu aaqqiissuteqarniarnerat ataatsimiititaliamit tamakkiisumik tapersersorneqarpoq, tassuunakkut USA-p Kalaallit Nunaanni qaqugukkulluunniit sakkutooqarfeqarnera inuiaqatigiinnut kalaallinut annertunerpaamik iluaqutissarsiffigineqarniassammat, ataatsimiititaliap nalunaarutaani taama allassimavoq.
Aamma atuaruk USA-mut nutaamik illersornissamut isumaqatigiissuteqartoqassanngilaq
Danskit nunanut allanut tunngasunut ministeriata Kristian Jensenip marsip qaammataani Folketingimi isumasiuisoqarnerani oqaatigaa, Danmarkip, Nunatta USA-llu akornanni 'illersornissamik isumaqatigiissut pillugu isumaqatigiinniaqqittoqarnissaa' ilimanaateqanngitsoq.
Ataatsimiititaliap piumasaqaataa pillugu danskit nunanut allanut ministeriat maannamut oqaaseqartissinnaasimanngilarput.
