USA nunat tamalaat isumaqatigiissutaannut ilannguteqqippoq
USA, silap pissusiata allanngoriartornerata akiorniarneqarnissaanut Parisimi 2015-imi isumaqatigiissummut pisortatigoortumik ilannguteqqippoq.
USA-p præsidentia Joe Biden, præsidentitut januaarip ulluisa 20-anni ivertinneqarami, USA-p Parisimi isumaqatigiissummut ilannguteqqinnissaa nalunaarutigaa.
Ilannguteqqinnissamut ullut 30-t utaqqineqareerlutik ullumi pisortatigoortunngorpoq. Tuluit tv-qarfiat BBC taama allaaserisaqarpoq.
Nunat 200-ngajaat Parisimi isumaqatigiissut 2015-imi atsiorpaat. Silap pissusiata allanngoriartornerata akiorniarneqarnissaanut taamaasillutik imminut pisussaaffilerput.
AAMMA ATUARUK Biden: USA silap pissusiata allanngoriartornerata akiorniarneqarnerani suleqataasariaqarpoq
Nunani tamalaani suliffissuaqalernerup siulianut naleqqiullugu silap ataatsimut isigalugu annerpaamik gradinik marlunnik - ajornanngippat aappaa affarmik - kiatsinnissaa, nunat tamalaat taamanikkut isumaqatigiissutigaat.
Parisimi isumaqatigiissutip USA-p aningaasarsiorneranut innarliisinneranik taallugu, USA-p taamanikkut præsidentiata Donald Trumpip USA isumaqatigiissummit peersippaa.
USA-p Parisimi isumaqatigiissummit aninera pisortatigoortumik siorna novembarimi atuutilerpoq, USA-lu taamaasilluni Parisimi isumaqatigiissummi ullut 100-t missaat ilaasortaanngilaq.
USA, nunani atsioqataasuni kisiartaalluni isumaqatigiissummiikkunnaartuugaluarpoq.