Biden: USA silap pissusiata allanngoriartornerata akiorniarneqarnerani suleqataasariaqarpoq
Silap pissusiata allanngoriartornerata akiorniarneqarnerani siuttuusariaqarpugut. USA-p præsidentia, Joe Biden, silap pissusiata allanngoriartornerata akiorniarneqarnissaanut iliuuseriniakkat pillugit peqqussutit arlallit pingasunngornermi atsioramigit taama oqarpoq.
Silap pissusia pillugu USA-mi apriilimi ataatsimeersuartoqarnissaa taassuma saniatigut nalunaarutigaa.
- Covid-19-ip akiorniarneqarneranut atatillugu nuna tamakkerlugu suleqatigiittariaqarnitsitut silap pissusiata allanngoriartornerata akiorniarneqarnerani tamatta suleqatigiittariaqarpugut. Silammi pissusia allanngoriartuinnarpoq, Biden præsidentip illorsuanit oqarpoq.
AAMMA ATUARUK Joe Bidenip USA Parisimi isumaqatigiissummut WHO-mullu ilannguteqikkaa
Silap pissusiata allanngoriartornerata akiorniarneqarnissaa Bidenip naalakkersuisoqataasalu suliassat pingaarnerit ilaattut siunniuppaat. Silap pissusiata allanngoriartuinnarnera nunarsuarmioqatigiinnut aarlerinartorsiortitsisoq Bidenip oqaatigaa, silalli pissusiata allanngoriartuinnarnerata akiorniarneqarnissaa USA-p aningaasarsiorneranut iluaqutaasinnaallunilu suliffissanik pilersitsinissamut aamma periarfissaasinnaanissaa oqaatigalugu.
Silap pissusia pillugu USA-mi apriilip ulluisa 22-anni ataatsimeersuartoqarnissaanut aggersaasoqarumaartoq, præsidentip illorsuata nalunaarutigaa. Gassit silaannarmik kissatsitsisartut aniatinneqarnerat qanoq ililluni annikillisarneqarsinnaanersut ataatsimeersuarnermi ilaatigut oqaluuserineqassaaq.
USA-mi naalagaaffiup pigisaani uuliasiorsinnaaneq gassimillu qalluisinnaaneq atorunnaarsikkiartuaarneqassasut, Bidenip peqqussutitigut aalajangerpaa. Silap pissusianut tunngasut USA-p nunanut allanut tunngasunut politikkiani pingaarutilittut inissisimanissaat ilaatigut oqaatigineqarpoq.