USA-p suliffeqarfiutilik Danmarkimi aallartitarilissagaa
Amerikamiu suliffeqarfiutilik 69-inik ukiullik Alan Leventhal, USA-p Danmarkimut taamalu aamma Kalaallit Nunaannut nutaatut aallartitassaatut USA-mi senatimi amerlanerussuteqartut akuersissutigaat.
Leventhal USA-p præsidentianit Joe Bidenimit toqqarneqarpoq.
AAMMA ATUARUK Bidenip niuertoq Danmarkimi aallartitassatut toqqaraa
USA-p Danmarkimut aallartitarisimasaata Carla Sandsip, præsidentiusimasumit Donald Trumpimit toqqarneqarsimasup, Danmark 2021-mi qimammaguli USA Danmarkimut aallartitaqarsimanngilaq.
Alan Leventhal suliffeqarfiutilittut maannamut inissisimavoq, USA-mi suliffeqarfiit allattoqarfiisa illussaannik piginnillunilu ingerlatsisimalluni.
Alan Leventhal Danmarkimut qaqugu tikissanersoq suli ilisimatitsissutigineqanngilaq.
Alan Leventhal Danmarkimi aallartitassatut Joe Bidenimit piukkunneqartoq, USA-p præsidentiata illorsuata ukioq manna januaarimi nalunaarutigaa.
AAMMA ATUARUK Rufus Gifford Joe Bidenip qineqqusaarnerani suleqataalertoq
Alan Leventhal nukissiuutit ataavartut pillugit suliniuteqartuusoq USA-mi demokratit oqaatigaat, Kunngeqarfik Danmarkimullu tamanna pillugu naleqquttoq oqaatigineqarluni.
USA-p Danmarkimut 2013-imit 2017-imut aallartitarisimasaata, Rufus Giffordip, Alan Leventhalip Danmarkimi aallartitanngornissaa aamma nuannaarutigaa. Rufus Gifford USA-p taamanikkut præsidenterisaanit Barack Obamamit toqqarneqarpoq.