Bidenip niuertoq Danmarkimi aallartitassatut toqqaraa

USA-p Danmarkimi aallartitaqarfia nalinginnaanngitsumik piffissami sivisuumi inuttaqanngilaq.

Tamanna allanngungajalerpoq.

USA-p præsidentiata, Joe Bidenip niuertoq, Alan Leventhal Københavnip qanittuanut Charlottenlundimi aallartitap illuanut nuuttussatut toqqaqqammerpaa.

Præsidentip illorsua, nittartakkamini taama paasissutissiivoq.

Leventhal USA-mi allaffinnik piginnimi niueruteqartumilu Beacon Capital Partnersimi ilaatigut qullersaavoq.

Tamatuma saniatigut Massachusetts Institute of Technologymi niuernermi ataatsimiiititaliamiippoq.

Illuutinilli attartortitsisartoq atuuffimmut pisortatigoortumik suli qinerneqanngilaq. Tamanna Senatip akuereqqaassavaa.

Kalaallit Nunaat pingaarnerpaasoq

Præsidentinngortop aallartitat qullersaannik taarsersuisarnera nalinginnaalluinnarpoq. Alan Levental akuerineqassaguni taassuma Carla Sands paarlassavaa.

Taanna præsidentiusimasumit, Donald Trumpimit toqqagaanikuuvoq.

Kalaallit Nunaat Carla Sandsip arlaleriarluni nunatsinni avannaanut kujataanullu tikeraartup pingaarnerpaatitaraa.

USA-p Nuummi konsulteqarfini ukiorpassuarni matoqqasimasoq piffissami tassani aamma ammaqqippaa.

AAMMA ATUARUK Aarlerinaatilinnik naliliineq: Russit Pituffimmi sakkussiorneq aarlerinartutut isigissavaat

USA nunatsinni suliniutinut matumani aatsitassanik, takornariaqarnermik ilinniartitaanermillu ukkatarinniffiusunut aningaasatigut isumaqatigiissuteqarmat oqallisigisaangaatsiarpoq.

Carla Sandsip siornatigut aallartitaasup Rufus Giffordip Barack Obamamit toqqarneqarnikuusup nunarput naalagaaffeqatigiinnerlu pingaartitarinngilai.