Rufus Gifford Joe Bidenip qineqqusaarnerani suleqataalertoq

USA-p Danmarkimi aallartitarisimasaa, Rufus Gifford, Joe Bidenip præsidentimut qineqqusaarneranut suleqataassaaq. Bloomberg News taama allaaserisaqarpoq.

Rufus Gifford Joe Bidenip qineqqusaarneranut siuttumut tullersortaassaaq. Joe Biden, USA-mi præsidentimut ukioq manna novembarimi qinersisoqarnissaanut atatillugu demokratit sinnerlugit Donald Trumpimut unammillertaassaaq.

AAMMA ATUARUK Biden Ohiomi allakkatigut qinersinermi ajugaasoq

Barack Obamap præsidentimut 2012-imi qineqqusaarnissaanut aningaasanik katersisoqarnerani Gifford aqutsisuuvoq.

Rufus Gifford, demokratit sinnerlugit innuttaasut sinnerlugit sinniisoqarfimmut, tassa Repræsentanternes Husimut 2018-imi qineqqusaaraluarpoq, qinigaananili.

AAMMA ATUARUK Amerikamiut aallartitaata Siriusip alapernaarsuisui tikeraarai

Rufus Gifford USA-p Danmarkimi aallartitaatut sulinermini nunatsinnut arlaleriarluni tikeraarpoq.

Nuummiinnermi saniatigut Pituffimmiippoq, Siriusip alapernaarsuisui peqatigalugit nunatta kangimut avannaarsuanut angalalluni.