Trumpip nalaani Issittoq eqqissisimanarnerussasoq

Donald Trump præsidentinngorniunnerup nalaani, akerliminut Hillary Clintonimut naleqqiulluni, Ruslandimut inussiarnerneruvoq.  

Mikkel Vedby Rasmussenilu naapertorlugu, Trumpip Ruslandimut ikinngutinnernera nunat taakku Issittumi suleqatigiinnerannut iluaqutaasinnaavoq.

Aamma atuaruk Qujaukitsoq: Republikanerit suniarnersut paasiniassavarput

Aamma atuaruk Canadap Rusland qaninnerusumik suleqatigerusukkaa

- Trumpip præsidentinngorneratigut Issittumi eqqissisimaneqarnerulersinnaavoq. Tassami Trump Vladimir Putinilu isumaqatigiissuteqarsinnaapput, tamatumalu kingunerisinnaavaa Rusland USA-lu Issittoq pillugu akersuuttarunnaartut, Mikkel Vedby Rasmussen oqarpoq.

Isumaqatigiissuteqarnikkulllu russit issittumi iliuuseqarsinnaanerulissapput. Kisianni killilimmik, professori isumaqarpoq.

- Russit piumasaqaataasa USA-p Alaskamik Kalaallit Nunaannillu soqutigisaqarneranik qanoq ilillutik akornusiisinnaanersut takorlooruminaatsippara. Kisianni aap, russit kiffaanngissuseqarnerussapput, tamakkiisumiinngitsorli.

USA Kinalu aporaannerulersinnaasut

USA Ruslandilu issittoq pillugu aporaannikinnerulerpata Kinap tamaani suliai nakkutigineqarnerulissapput. Kinammi Kalaallit Nunaanni issittumilu akuliunnissaa USA-p iluarinngilaa.

Donald Trumpilu præsidentinngorpat Kinap issittumi susassaqarniarnera nakkutigineqarnerulissaaq, Mikkel Vedby Rasmussen isumaqarpoq.

Aamma atuaruk Rusland Kristian Jensenimit itigartinneqarpoq

- USA Kinalu aporaannerulissapput. Taavalu aamma Beijingip assersuutigalugu Kalaallit Nunaanni aningaasaliisimanera Washingtonimi nunannarinneqanngitsoq erseqqinnerulissalluni, Københavnip universitetiani professori Mikkel Vedby Rasmussen oqarpoq