Canadap Rusland qaninnerusumik suleqatigerusukkaa
USA-mi præsidentimut qinersinermi akioriinnerni præsidentinngorniuuttut Rusland oqaloqatigineqassanersoq imaluunniit oqaloqatigineqassanngitsoq assortuussutigaat. Canadalli maanna erseqqissaatigaa Ruslandip isumaqatigiinniarfiginissaanut suleqatiginissaanullu piareersimalluni.
Canadami nunanut allanut politikkiminik qaammatip matuma ingerlanerani allanngortitsivoq. Canadami nunanut allanut tunngasunut ministerip Stéphane Dionip oqaatigaa Canadap issittumi pissutsinut tunngatillugu Ruslandip suleqatiginissaa pimoorullugu maanna sulissutiginiaraa.
Canadap Ruslandillu issittup 75 procentia oqartussaaffigaat. Taamaammat marluullutik naalagaaffiupput issittumi pissaanilissuit.
Stéphane Dionip aamma oqaatigaa issittumut tunngatillugu pissutsit assigiinngitsorpassuit pillugit Ruslandip suleqatiginissaa Canadamut pingaartuusoq.
- Sakkutooqarnikkummi aporaannerit annertusaanerillu Issittumi pissanngillat, Dion.
Nunat marluusut suleqatigiinnissartik soqutigisaqarfigaat.
Rusland aningaasarsiornikkut ajornartorsiorfiuvoq nunarsuarmilu sumiiffinni allani sakkutooqarnikkut aamma ingerlataqarluni.
Canadalu Ruslanditulli sakkutooqarnikkut nukittutiginani Canadap issittortaani sakkutuulersuissaguni aningaasat milliarderpassuit atortariaqassavai.
Issittumi pissutsit pillugit immikkut ilisimasalik Michael Byers aviisimi Globe and Mailimi allappoq Canadap isummaminik allanngortitsinera pingaartuusoq, oqaloqatigiinnermut pitsaanerusumut angusaqarfiunerusumullu periarfissanik ammaassissammat, Ruslandip Canadallu attaveqarnerannuinnaanngitsoq, aammali nunanut allanut tunngatillugu. Suleqatigiinnissarmi oqaloqatigiinnissarlu nunarsuarmi maannakkorpiaq pisariaqartinneqarluinnarmat.
