Qujaukitsoq: Republikanerit suniarnersut paasiniassavarput
- Isumaqarpunga siusippallaartoq oqaatigissallugu suna Nunatsinnut iluarnerunersoq. Tassami demokraatiuppata republikaneriuppataluunniit apeqqutaavallaarunanngilaq kina præsidentitut issianersoq, Vittus Qujaukitsoq KNR-imut oqarpoq.
Taassuma USA-mi republikanerit amerlanerussuteqalerneri pissanganartutut isigaa.
- Pissanganartua uaniilerpoq kongressimi senatimilu republikanerinit qinikkat 1928-imit aatsaat amerlanerussuteqalerneri. Qanoq isillugit Nunatsinnut issittumullu samminerulernissaannut paasitinniassallugit, nassaariniartussaassagatsigu suna anguniarneraat, Qujakitsoq oqarpoq.
- Soorunami. Aamma amerikamiut Nunatsinnut tunngatillugu assigiinngitsorpassuarnik Pituffimmut tunngasuinnaanngitsut kisianni sakkutooqarfiusimasunut illersornissamullu isumaqatigiissummut isumaqatigiinniuteqaqqinnissamut piumasaqarnikuugatta naatsorsuutigaarput taakku naammassillugit aaqqiissuteqarfiginissaat, Qujaukitsoq naggasiivoq.
USAmi qinersinermi republikanerineersoq Donald Trump ajugaavoq.
Januarimilu præsidentinngortussanngorluni.
Washintonimi kalaallit aallartitaqarfiani pisortap, Inuuteq Holm Olsenip, Hillary Clintonip qinigaanissaa ilimagineqarsimagaluartoq oqaatigaa.
- Qinersinerulli takutippaa qinersisartut politikkimik nutaamik perusuttut nutaamillu siuttoqarusuttut, Inuuteq Holm Olsen KNR-imut oqarpoq.
Taanna Vittus Qujaukitsutulli USA-mi politikkip qanoq isikkoqalernissaa paasiniassallugu pingaartippaa.
- Soorunami inuit nutaat isertussat suleqatigissavagut. Taamaattumik imatut sunniuteqangaarnavianngilaq. Kisianni soorunami pingaaruteqassaaq takussallugu qaammatini tulliuttuni politikki qanoq isikkoqarumaarnersoq, Nunatta Washingtonimi sinniisoqarfiani pisortaq Inuuteq Holm Olsen oqarpoq.