Barack Obama Cubamiittoq

Obama ilaquttani ilagalugit Cubap illoqafiisa pingaarnersaata Havanap timmisartoqarfissuani Jose Martimut sapaatiummat mippoq:

- Haluu Cuba, qanoq ippisi? Meqqammerpunga, Cubamiullu naapinnissaat tusarnaassallugillu qilanaaraara, Obama, Havanamut tikissimatsiaannarluni Twitterikkut taama ilaatigut allaaserisaqarpoq.

Obama qungujuttuinnaalluni timmisartumit kingorna niuvoq, nuliani Michelle, paninilu Sasha aamma Malia peqatigalugit tikeraarluni.

Obamakkut Cubap nunanut allanut tunngasunut ministerianit Bruno Rodriguezimit tikilluaqquneqarput, biilinullu kingorna ikillutik.

Obamakkut Havanatoqqamut sapaatiummat unnukkut takuniaapput, tamannali sioqqullugu Obama USA-p Havanami aallartitaqarfianut alakkaappoq, tamaani sulisut ilassiartorlugit. Tassunga atatillugu ilaatigut oqaatigaa Cubamut tikeraarneq Cubamik akerariinnerup qaangiarneqarnissaanut periarfissiilluartoq.

Barack Obamap Cubap præsidentia Raul Castro ippassaq ataatsimeeqatigivaa.

Obama taava tv-kkut toqqaannartumik aallakaatinneqartussamik ullumikkut marlunngornermi oqalugiassaaq, inuttullu pisinnaatitaaffiit pillugit suliniutillit aamma naapittussaallugit, Washingtonimullu kingorna utissalluni.

Obama ullumikkut marlunngornermi Cubamiit aallassaaq.