FN-imut nalunaartartoq: USA-p nunatsinni suliai ernumalersitsipput
USA-p sakkutuuminik ukiuni 70-init amerlanerusuni nunatsinniisitsisimanera nunatta inuinik ernumatitsillunilu tatiginninngititsivoq. FN-ip immikkut nalunaartartua Baskut Tuncak sapaatit akunnerat kingulleq nunatsinneereerluni taama inerniliivoq.
Ingammik Pituffimmi sakkutooqarfissaq inissaqaqqullugu Uummannamiit pinngitsaaliilluni 1953-imi nuutsitsineq nunatta inuisa tarnikkut anniaatigiualersimagaat, FN-imut nalunaartartoq, Baskut Tuncak, KNR-imut oqarpoq.
- Una annerineqaqaaq. Avanersuarmiunuinnaanngitsoq, aammali Kalaallit nunaanni sumiiffinni tamani.
USA-llu sakkutooqarfigisimasai ilumut soqarnersut ukiut ingerlanerini saqqummerarneranni tatiginninnginneq anneruliinnarsimavoq.
- Sakkutooqarfiit amerlasuut matoreersut, paasissutissanik nutaanik saqqummerartoqaannavippoq. Kusernikkaajunerusunik mikisunnguakkaanik. Paasissutissanik qulaajaaneq paasissutissallu suli amigaataasut tamanik ernumalersitsipput apeqqusiillutillu, Baskut Tuncak oqarpoq.
Paasissutissat amigaataasut tatiginnikkunnaarsitsisut
USA taamaallaat Pituffimiisitsigaluartoq, Amerikamiut suliaat kalaallinut apeqqutissarpassuaqartitsipput isumaqartitsillutillu, USA-p naalakkersuisui paasissutissanik suli tunniussinaveersaartut. Baskut Tuncak taama naliliivoq.
- Paasissutissat tunniunneqarnissaasa tungaanut kalaallillu paasissutissanik tunineqarsimasutut misigisimalernissaasa tungaanut, akornuteqanngitsumik paasissutissarsisinnaaneq amigassasoq isumaqarpunga. Siunissami piumaartussat pillugit manna ilinniarfigineqassasoq neriuppunga, ernumasoqaqqunagu taamaalilluni paasissutissat aaqqissuussaanerusumik tunniunneqartalerlutik, nalunaartartoq oqarpoq.
AAMMA ATUARUK USA radarimik annertusaanissaminut akuerineqareerpoq
Nalunaartartoq: Danmark saliippat saliisoqannginneraniit ajunnginneruvoq
FN-imut nalunaartartup nunatsinnut tikeraarnera qallunaat 2015-imi aggersaaneranik aalaaveqarpoq.
Nunanut allanut tunngasunut tamani naalakkersuisuusup, Vittus Qujaukitsup, Danmark inuit pisinnaatitaaffiinik nunatsinni unioqqutitsinerarlugu FN-imut, tassalu aamma ilaatigut Baskut Tuncak-imut, maalaaruteqarsimasoq, upernaaq tutsiuppoq.
Naalakkersuisulli maalaarut kingusinnerusukkut tunuartippaat. Tuncakilu naapertorlugu nammineq tikeraarnera Qujaukitsup maalaarutaanik sutigulluunniit peqquteqanngilaq, naak maalaarummik tigusineq tikeraarnissamik siuartitsissutaagaluartoq.
USA-lli nunatsinni sakkutooqarfigisimasaani saliiniarneq pillugu FN-ip nalunaartartuata Danmark nersualaarpaa. Naak aamma saliinissaq Danmarkip ilumut suliassarineraa apeqquseraluarlugu.
- Tamanna ernumanartortaqarpoq. Piviusorli tassaavoq, Amerikamiut sakkutooqarfitik qimatsitermatigit, taava Danmark saleeqataanissamut akuersaarmat. aperisoqarsinnaavoq, qallunaat paasissutissat pisariaqartitatik tamaasa pissarsiarisimaneraat, imaluunniit pissutsit allat atuussimanersut.
AAMMA ATUARUK Pituffik-radar opgraderet for knap halv milliard kroner
AAMMA ATUARUK Ministereqarfik radareqarfik pillugu ilisimatinneqareersoq
Kisianni nunarsuarmi allani inuit pisiinnaatitaaffii unioqqutinneqarnerannik kinguneqartumik naalakkersuisut akisussaaffik pillugu akersuunneranni, maani saliisoqassammat pingaartuusoq, Baskut Tuncak oqarpoq.
- Maannakkorpiaq piviusuuvoq, silap pissusia allanngoriartormat allanngoriartorneralu sukkatsikkiartorluni. Taamaammat qallunaat naalakkersuisui akisussaaffimmik tigusimmata pitsaasutut isigaara.
FN-p immikkut nalunaartartuata nunatsinni aatsitassarsiulertoqarsinnaanera aamma ukkataraa.
Nunattalu inuinut aatsitassarsiornissami kingunerusussat pillugit sapinngisamik paasissutissiilluarnissamik kaammattuivoq.
Taanna tikeraarnermini misissukkaminit innersuussutitalimmik nalunaarusiamik FN-ip inuit pisinnaatitaaffii pillugit siunnersuisoqatigiivinut aappaagu 2018-imi septembarimi saqqummiussissaaq.
