Trump: USA-p Mexicomut killeqarfia matuneqarallartussanngorunarpoq
USA-p præsidentia Donald Trump ullumi taama oqarpoq.
Inuit tuusintilikkaat Amerika Qiterlermeersut Mexico aqqutigalugu uSA-p tungaanut sapaatip-akunnerini kingullerni ingerlaareerput. Trump tamanna pillugu killeqarfiup nalaanut tuusintilikkaanik sakkutuulersuisitsivoq, killeqarfimmik taakku nakkutilliisussanngortinneqarlutik.
Sakkutuullu pisariaqassappat toqutsillutik eqqarsinnaanissaat ajoriffissartinnagu, Trumpip aamma oqaatigisimavaa.
- Pisariaqassappat igittariaqarsinnaassapput, toqusoqarneranilluunniit malitseqassappat. Tamanna ajoriffissaqartinngilara, neriuppungali taamaalisoqassanngitsoq, Donald Trump oqarpoq.
USA-p Mexicollu akornanni killeqarfimmi qarmarsualiortoqarnissaa, Trumpip præsidentimut 2016-imi qinersisoqarnerani ilaatigut qineqqusaarutigaa. Inuit inatsisinik unioqqutitsillutik USA-mut isaasut pakkersimaarniarlugit, ikiaroornartumillu anngiortumik eqqussuisut akiorniarneqarnissaat pillugu Trump taamaaliorniarpoq.
Republikanerilluunniit senatimi innuttaasullu sinnerlugit sinniisoqarfimmi Repræsentanternes Husimi amerlanerussuteqarmata qarmarsualiortoqarnissaanut Trumpip siunnersuutaa amerlanerussuteqartunit tapersersorneqanngilaq, demokratillu Repræsentanternes Husimi maanna amerlanerussuteqalermata qarmarsualiornissamut siunnersuut piviusunngorsinnaassagunanngilaq.