USA-p Iranillu akornanni tallimanngornermi eqqartueqatigiinnissat taamaatiinnarneqartut

USA-p Iranillu oqaloqatigiinnerat Schweizimi tallimanngornermi pisussaagaluartoq taamaatiinnarneqarpoq.

Tamanna Schweizip nunanut allanut ministereqarfianit tallimanngornermi ullaakkut nalunaarummit paasinarsivoq.

- USA-p, Iranip, Qatarip Pakistanillu oqaloqatigiinnissaat kinguartinneqarpoq.

- Schweizip oqaloqatigiinnerit taakkua ingerlannissaannut suli piareersimavoq. Bürgenstockimi piareersaanerit uninnavianngillat, Schweizip nunanut allanut ministereqarfia nutaarsiassaqartitsivimmut AFP-mut taama paasissutissiivoq.

USA-p Iranillu tallimanngornermi ataatsimiinnissaat Schweizip qaqqaani Bürgenstock-resortimi pisussaagaluarpoq.

Qatar Pakistanilu isumaqatigiinniartitsisutut peqataasussaallutik.

Teknikkikkut oqaloqatigiinneq

Schweizip nunanut allanut ministereqarfiata Iranip USA-llu ataatsimiinnissaata sooq taamaatiinnarneqarnera oqaatiginngilaa.

AFP-p nutaarsiassiinera naapertorlugu, præsidentip illorsuanit oqaaseqartartoq, USA-p præsidentiata tullersortaata, J.D. Vancep, Schweizimut angalanissani kinguartereeraalu ministeriaqarfik nalunaaquttap akunneri arlaqanngitsut qaangiummata taama nalunaaruteqarpoq.

Vancep sisamanngornermi unnukkut USA-mit aallarnissaa pilersaarutaagaluarpoq.

- Isumaqatiginninniarnernut tunngatillugu angallassiniarneq ajornaatsuinnaanngisaanarpoq naatsoruminanngisaannarlunilu. Præsidentip tullersortaa unnummut aallassanngilaq, oqaaseqartartoq AFP-mut oqarpoq.

- Teknikkikkut oqaloqatigiinnerit piaarnerpaamik aallartinnissaat qilanaaraarput, nangilluni allassimavoq.

Amerikamiut tusagassiorfiata CNN-ip nutaarsiassiinera naapertorlugu, præsidentip illorsua "suliamut tunngatillugu paasissutissaqaleqqippat" ingerlaannaq nalunaaruteqassaaq.  

Isumaqatiginninniarfik

USA-p Iranillu isumaqatigiissut Memorandum of Understanding-imik taaneqartoq (MoU), sapaatip-akunnerani kingullermi sapaammi isumaqatigiissutigaat.

Aallaqqaammut isumaqatigiissut, danskisut aftalememorandumitut taaneqarsinnaasoq,  Schweizimi tallimanngornermi atsiorneqartussatut oqaatigineqarpoq.

USA-lli præsidentiata Donald Trumpip Iranimut killissaliussamik isumaqatigiissut Frankrigimi Parisip avataani Versaillesip illussaarsuani pingasunngornermili atsiorpaa.

Iranip præsidentiata Masoud Pezeshkianip isumaqatigiissut aamma atsioreerpaa.

Isumaqatigiissut præsidentinit marlunnit atsiorneqarmat ulluni 60-ini isumaqatigiinniartoqartussanngussasoq USA-mi præsidentip tullersortaa J.D. Vance tusagassiortunik sisamanngornermi katersortitsinermi oqarpoq.

- Oqarusuppunga ullut 60-it taakkua ullumi pisortatigoortumik aallartittut, Vance sisamanngornermi oqarpoq.

Donald Trumpip Iranip atominik sakkussiaqalinnginnissaa anguniarlugu Iranimut sorsulernini tunngavilersuutigaa

USA Israelilu Iranimut februaarip 28-anni sorsulerput. 

/ritzau/