Kisitsit: Trumpip 37-riarluni USA Iranimik isumaqatigiissuteqangajalerneraraa
USA-p præsidentiata Donald Trumpip Iranimi sorsunneq ullut marluk pingasulluunniit qaangiutsinnagit unitsinneqarsinnaanerarlugu marlunngornerup unnuaani oqaatigaa.
Isumaqatigiittoqangajalerneranilli oqariartuuteqarnera aatsaat pilinngilaq.
USA-mi tusagassiuutip CNN-ip nalunaarsugaatai naapertorlugit, Trumpip tamanna Iranimut sorsunnerup nalaani 37-riarluni oqaatigisimavaa.
- Taama oqalunnera pimoorussinertut inunnit isigineqarsinnaajunnaareernera erseqqippoq, CNN kisitsisit misissoqqissaarneqarneranut atatillugu allappoq.
USA Iranilu qaammatit marluk matuma siorna sakkuaakkunnaarnissaq pillugu isumaqatigiipput.
Trumpip taamani - apriilip arfineq-aappaanni - oqaatigaa, illuatungeriit sorsunnerup univinnissaanik kinguneqartussamik isumaqatigiissuteqangajalersut. Præsidentip oqarnera naapertorlugu, Iran USA-lu isumaqatigiissummik naammassinninnissamut sapaatip-akunneri marluk taamani pisariaqartippaat.
Nalunngisatsitut taama pisoqanngilaq.
Aamma pisunut allanut atatillugu arlaleriarluni taama oqartarpoq.
USA-p præsidentiata USA-p Iranillu sorsunnermik unitsitsinissaq pillugu marlunngornerup unnuaani isumaqatigiissuteqangajalernerarpai.
- Isumaqatigiissut pitsaalluinnartoq, atomimik sakkussiaqarnissamut akuersaanngisaannartoq, naammassinialeruttorparput, Trump tusagassiortunut New Yorkimi basketballertartut pissartanngorniunnerannut najuutereerluni CNN naapertorlugu oqarpoq.
Iranimi umiarsualiviit assersorneqartut
Amerikamiut Iranimiullu saassussisaqattaarneri tamangajammik sakkuaakkunnaartoqarnerata nalaani unitsinneqarmata, USA-p Iranip umiarsualivii assersulerpai.
Amerikamiut assersuinerup kingunerisaanik umiarsuarnut arlalinnut, USA-p oqarnera naapertorlugu, Iranip umiarsualiviinit aallartunut umiarsualiviannukartunulluunniit, arlaleriarlutik saassussipput.
Israelip Iranillu saassussinertik aamma tamakkiingajattumik unitsippaat, imminnulli ataasinngornermi saassupput.
Iranip Israel rakettinik missilinik, Israelip Libanonimi Hizbollahp sakkutuuinik saassussiuarnera pissutigalugu, saassuppaa.
Hizbollah Iranimit tapersersorneqarlunilu iligineqarpoq.
USA-p præsidentia Israelip ministeriunera, Benjamin Netanjahu, Iranimut sorsuleqqinniarnerani mianersoqqusimallugu tusagassiorfimmut Axiosimut ataasinngornermi oqarpoq.
- Oqarpunga: Bibi (Netanyahu, aaqq.), mianersortariaqarputit, taamaanngippat qanittukkut imminiigaassaatit, Trump oqarpoq.
/ritzau/
