USA-p illersornissaqarfiata Gazami talittarfiugallartussaliaa naammassingajalertoq
Gazami talittarfiugallartussamik USA-p illersornissaqarfiata sanaartornera naammassingajalerpoq. Umiarsuit ikiorsiissutinik usillit ikiorsiissutit talittarfiugallartussamut tulaattassavaat, palæstiinamiut ikiorsiissutissanik pilersorneqarsinnaalissallutik.
USA-p illersornissaqarfiata oqaaseqartitaa taama ilisimatitsivoq.
Talittarfik puttasuliatut sanaajussaaq, tungaanullu aqqusiniugallartussamik aamma pilersitsoqassalluni.
Lastbiilit ikiorsiissutinik usisinnaasut usitik Gazami peqqumaasivinnut taamaasillutik pajugutigisinnaalissavaat.
- Talittarfiugallartussaq 50 procentimik maanna naammassereerpoq, oqaaseqartitaq oqarpoq.
- Talittarfik puttasuliaq naammassereerpoq, aqqusiniugallartussarlu sananeqartussanngorluni, taanna oqarpoq.
Ikiorsiissutinik Gazamut pajuttoqarsinnaaleqqullugu talittarfiugallartussamik pilersitsisoqarnissaa, USA-p siulliulluni siunnersuutigaa.
Talittarfik naammassippat, lastbiilit ullormut 150-it ikiorsiissutinik usillutik Gazamut pilersuisinnaalissapput.
Pingaartumik imermik, nerisassanik nakorsaatinillu pisariaqartitsisoqartoq, Naalagaaffiit Peqatigiit peqqissuunissaq pillugu suleqatigiiffiata WHO-p oqaatigaa, Gazamilu innuttaasut akornanni kaannersuaqalersinnaanera mianersoqqussutiginikuullugu.